Gréta María ó­vænt hætt hjá Prís

Gréta María vildi ekki tjá sig nánar um tímamótin sem hún segir að hafi borið upp á mánudaginn. Í nýrri mælingu verðlagseftirlits ASÍ mældist verðlag í Prís lægst á átta algengum jólavörum.

Gréta María hefur verið áberandi í viðskiptalífinu undanfarin ár. Hún er menntaður véla- og iðnaðarverkfræðingur, var í bankageiranum til 2016 þegar hún tók við starfi framkvæmdastjóra Krónunnar. Hún gegndi starfinu í fjögur ár en sagði óvænt upp starfi sínu þar árið 2020 vegna framgöngu Festismanna í hlutabótaumræðunni. Festi þáði bætur frá ríkinu þrátt fyrir að sjá fram á milljarða króna hagnað það árið.

Gréta réð sig í framhaldinu til sjávarútvegsfyrirtækisins Brims og fór svo í ferðaþjónustuna með Arctic Adventures. Hún réð sig svo til Heimkaupa áður en hún settist í brúna hjá Prís.

Ekki náðist í Auði Daníelsdóttur forstjóra Dranga. Þá náðist heldur ekki í Jón Ásgeir Jóhannesson stjórnarformann Skeljar, stærsta eiganda Dranga sem á Prís.

Uppfært klukkan 16:10

„Prís mun færast undir það svið sem Svanur Valgeirsson framkvæmdastjóri hjá Samkaupum stýrir í dag. Gréta María hefur leitt uppbyggingu Prís frá upphafi og skilar af sér sterku vörumerki, við þökkum henni fyrir vel unnin störf og óskum henni velfarnaðar,“ segir Auður Daníelsdóttir forstjóri Drangs í skriflegu svari til Vísis.

Rætt var við Grétu Maríu í Íslandi í dag þegar hún tók við starfi framkvæmdastjóra Prís í fyrra.