Haukur í ham gegn sveinum Guð­jóns Vals

Haukur var næstmarkahæstur hjá Löwen með átta mörk og gaf einnig flestar stoðsendingar eða fimm talsins.

Löwen var 19-18 yfir í hálfleik en staðan var jöfn, 28-28, þegar tólf mínútur voru eftir. Þá komu hins vegar þrjú mörk í röð frá heimamönnum sem héldu 2-4 marka forskoti út leikinn.

Elliði Snær Viðarsson skoraði þrjú marka Gummersbach en Teitur Örn Einarsson var ekki á meðal markaskorara í liði Guðjóns Vals Sigurðssonar að þessu sinni.

Gummersbach er þó áfram ofar í deildinni, í 6. sæti með 21 stig, þremur stigum fyrir ofan Löwen sem er í 7. sæti nú þegar 16 umferðum er lokið. Enn eru þó þrjár umferðir eftir fram að EM-hléinu í janúar.

Lærisveinar Arnórs með sætan sigur

Bergischer, undir stjórn Arnórs Þórs Gunnarssonar, vann afar sætan sigur gegn Eisenach, 27-26. 

Bergsicher var með frumkvæðið stærstan hluta leiksins en staðan var jöfn, 24-24, þegar aðeins fimm mínútur voru eftir. Heimamenn skoruðu þá næstu þrjú mörk og þó að gestirnir næðu að minnka muninn í eitt mark, sextán sekúndum fyrir leikslok, dugði það til sigurs.

Bergischer komst þar með upp fyrir Minden, í 15. sæti af 18 liðum deildarinnar, og er með tíu stig, stigi á eftir Eisenach.

Arnór Viðars markahæstur í sigri í Svíþjóð

Í Svíþjóð vann Íslendingaliðið Karlskrona sex marka sigur gegn Skövde, 30-24. Arnór Viðarsson var markahæstur Karlskrona í leiknum með sjö mörk úr ellefu skotum en liðið var enn á ný án Ólafs Guðmundssonar sem glímt hefur við meiðsli.

Karlskrona er nú með 15 stig í 7. sæti en Skövde er sæti ofar með 16 stig. Karlskrona á þó leik til góða.

Donni fagnaði í Danmörku

Í dönsku úrvalsdeildinni skoraði Kristján Örn Kristjánsson, eða Donni, sex mörk úr níu skotum og var næstmarkahæstur hjá SAH í 37-30 sigri gegn Fredericia.

SAH er í 3. sæti deildarinnar með 20 stig, stigi á eftir Mors-Thy en 12 stigum á eftir toppliði Álaborgar, eftir 16 umferðir. Fredericia, gamla liðið hans Guðmundar Guðmundssonar, er í þriðja neðsta sæti með aðeins 11 stig.