Fá Egypta í Höllina fyrir HM og heim­sækja þá líka

Snorri Steinn Guðjónsson landsliðsþjálfari greindi frá þessu á blaðamannafundi í dag og sagði það geta reynst afar gagnlegt að fá nú loks að sinna undirbúningi fyrir stórmót með því að spila leiki hér á landi. Og það gegn verulega sterkum mótherjum.

„Það er fáránlega mikilvægt fyrir okkur að máta okkur við svona heimsklassalið,“ sagði Snorri en leikirnir við Egypta hér á landi verða 7. og 9. janúar, áður en íslenski hópurinn heldur svo á HM í Þýskalandi.

Næstu leikir Íslands eru vináttulandsleikir við Svía 19. og 21. mars hér á landi en Snorri tilkynnti á fundinum í dag að einnig yrði svo farið til Egyptalands í maí og spilaðir þar tveir vináttulandsleikir við heimamenn, þann 19. og 21. maí.

Snorri valdi eins sterkt lið og hann gat í leikina við Svía en sagði að í maí gæfist svo tækifæri til að prófa nýja hluti, bæði hvað taktík og leikmenn varðaði.

Undankeppni EM hefst svo í haust með leikjum í nóvember en dregið verður í hana 26. mars.