Skýrsla Ágústs: Ekki lengur reynslulausar

Lítið vægi var sett á úrslitin á þessu móti, en góður sigur vannst gegn Færeyjum í kvöld. 

Öllu frekar var jákvæðnin við völd á þessu móti og bæði þjálfari og leikmenn liðsins töluðu um mótið sem uppbyggingarverkefni fyrir framtíðina.

Sem er gott og vel, meirihluti liðsins var að spila á HM í fyrsta sinn og margar hverjar voru með litla landsliðsreynslu fyrir.

Nú hafa þær hins vegar allar fengið að spreyta sig og flestar spiluðu heilmikið á mótinu. Þjálfarinn var duglegur að rúlla liðinu og leyfa varamönnum að koma inn á. Yfirleitt spiluðu allar eitthvað í öllum leikjum.

Þetta unga og reynslulitla lið er því ekki lengur svo reynslulaust, og er alls ekkert mikið yngra heldur en mörg lið á mótinu sem hafa verið að gera góða hluti. 

Allar eru þær sammála um að síðustu þrjár vikur hafi þétt hópinn vel saman og stefnan er sett á að stíga framfaraskref. Hætta að vera ungt og reynslaust lið og verða alvöru lið í alþjóða handboltanum, því gæðin eru alveg til staðar.

Næsta verkefni verður að komast inn á EM á næsta ári og stelpurnar okkar munu þurfa að hafa sig allar við því þær töpuðu fyrstu tveimur leikjunum í undankeppninni. 

Brekkan er því nokkuð brött en það verður vonandi gaman að sjá stelpurnar okkar standa hnarreistar eftir að hafa sótt stórmótareynslu til Þýskalands.