„Mér finnst við eiga mikið inni“

Elín er markahæsti leikmaður Savehof á tímabilinu og fjórði markahæsti leikmaður deildarinnar, þar sem liðið trónir á toppnum.

„Við tryggðum okkur deildarmeistaratitilinn í síðasta leik, þannig að það er komið þó við eigum þrjá leiki eftir í deildinni. Það hefur gengið mjög vel eftir áramót hjá okkur“ sagði Elín.

Hún er hins vegar hógvær og vildi ekki gera mikið úr sínum þætti í velgengninni.

„Við erum bara með mjög sterkt lið. Þetta er ekki einstaklingsíþrótt, þetta er liðsíþrótt. Við erum með svolítið nýtt lið í Savehof en erum að finna hvorar aðrar enn betur og betur.“

Þessa stundina er Elín þó með hugann við landsliðsverkefnið en hún verður í eldlínunni þegar Ísland mætir Svartfjallalandi í kvöld og á sunnudag.

Elín sagðist ánægð með að koma aftur heim og hitta stelpurnar. Þær væru staðráðnar í að sýna betri frammistöðu en í síðasta leik gegn Svartfjallalandi.

„Við tókum góðan fund í gær og skoðuðum þann leik aðeins. Mér finnst við eiga mikið inni. Við hefðum getað verið mun grófari og fastari fyrir varnarlega. Það er eitthvað sem við þurfum að gera á móti svona liði. Þær eru stórar og sterkar þannig að það er virkilega mikilvægt að við spilum á okkar styrkleikum og keyrum á þær.“