Jordan reynir að troða á stjórn­endum sports „sveita­lubba“

Jordan er eigandi liðsins 23XI Racing sem keppir í NASCAR, vinsælustu akstursíþrótt í Bandaríkjunum. Hann og fleiri saka NASCAR um einokunartilburði í tengslum við svokallaða stofnskrá sem skipuleggjendur komu á fyrir tæpum áratug.

Fyrirkomulagið þýðir að með því að kaupa sig inn í stofnskrá NASCAR fá lið sérleyfi sem tryggir þeim þátttöku í öllum 38 kappökstrum ársins. Í staðinn fá þau hlutdeild í tekjum og áhrif á stjórn mótaraðarinnar. Endurnýja þarf sérleyfin og NASCAR getur afturkallað þau.

Harðvítugar deilur hafa geisað á milli liðs Jordan og NASCAR um endurnýjun á stofnskránni. Jordan og félagar kröfðust hagstæðari kjara en þegar NASCAR neitaði að láta undan neituðu þeir og eitt annað lið að skrifa undir. Í kjölfarið stefndu liðin tvö NASCAR á grundvelli samkeppnissjónarmiða.

Í millitíðinni hafa 23XI og Front Row Motorsports, hitt liðið sem neitaði að skrifa undir, þurft að vinna sér sæti í hverri keppni í tímatökum. Lið Jordan hefur enn ekki misst af keppni en það segist hafa orðið af milljónum dollara í tekjur vegna þess að það stendur fyrir utan stofnskrána.

Gæti gerbreytt íþróttinni

Málið gæti haft gríðarlega afleiðingar fyrir NASCAR. Fyrir utan að þurfa að greiða Jordan og félögum beinharða peninga í bætur gæti dómari skikkað France-fjölskylduna sem á og stofnaði hana á sínum tíma til þess að selja hana, leysa upp stofnskrárfyrirkomulagið eða gera sérleyfin varanleg.

Þá er mögulegt að NASCAR yrði þvingað til þess að selja kappastursbrautir sem keppt er á en mótaröðin á margar þeirra sjálf, að því er kemur fram í frétt AP-fréttastofunnar.

Tapi Jordan er hins vegar talið ólíklegt að lið hans haldi áfram eftir næsta ár. Sex sérleyfi sem NASCAR hefur þurft að halda til hliðar gætu þá verið seld hæstbjóðanda. Síðast seldist slíkt leyfi á hátt í sjö milljarða íslenskra króna.

Sagðist tapa meira í spilavíti en hann greiddi einum ökumanna sinna

Þótt málið sé fyrst nú að koma til beinna kasta dómstóla hefur rekstur þess reynst öllum aðilum þungbært. Hvor aðila á kröfu um gögn frá hinum í tengslum við málsóknina og þau hafa falið í sér ýmislegt vandræðalegt.

Þannig voru aðdáendur NASCAR kallaðir ólæsir í samskiptum stjórnenda mótaraðarinnar. Steve Phelps, framkvæmdastjóri NASCAR, kallaði jafnframt einn liðseiganda „heimskan sveitalubba“. Stjórnendur töluðu einnig um að það þyrfti að „hýða“ eigandann.

Forseti 23XI Racing sagði svo í tölvupósti að Jim France, stjórnarformaður NASCAR, þyrfti að „deyja“ svo að liðið gæti samið um hagstæðari kjör á sérleyfinu. Jordan sjálfur grínaðist með það að hann tapaði meira fé í spilavítum en hann greiddi einum ökumanna sinna í laun.