Skulda annarri konu fleiri milljónir vegna launamismunar

Þetta segir í dómi Landsréttar, sem kveðinn var upp í gær. Í dóminum hefur nafn stofnunarinnar verið afmáð en á dagskrá Landsréttar í gær hafði það ekki verið gert.

Allt að 813 þúsund krónur á mánuði

Í dómi héraðsdóms, sem kveðinn var upp í júlí í fyrra og staðfestur af Landsrétti, var rakið að óumdeilt væri að verulegur munur hefði verið á launum og öðrum starfskjörum konunnar og tiltekins karlkyns lögfræðings hjá IHS. 

Héraðsdómur féllst á með konunni að í ákvörðun stofnunarinnar um laun hennar hefði falist mismunun, sem hefði farið í bága við þágildandi lög um jafna stöðu og jafnan rétt kvenna og karla og síðar núgildandi sömu lög.

Í dómnum var því jafnframt slegið föstu að á þeirri saknæmu og ólögmætu háttsemi bæri IHS bótaábyrgð, enda hefði konan orðið fyrir fjártjóni af völdum háttseminnar, sem talið var nema þeim mun sem verið hafði á launum hennar og tiltekins karlskyns lögfræðings hjá stofnuninni.

Samkvæmt töflu í dómi héraðsdóms nam launamunurinn frá 363.936 krónum á mánuði upp í 812.974 krónur. Samtals nam munurinn 15.214.731 krónu á tveimur árum og 10 mánuðum.

Stofnunin var dæmd til þess að greiða konunni téðan mismun ásamt dráttarvöxtum og eina milljón króna í miskabætur. Loks ber stofnuninni að greiða konunni alls 3,15 milljónir króna í málskostnað.

Nítján milljónir árið 2023

Málið er ekki það fyrsta sinnar tegundar hjá IHS en árið 2023 var stofnunin dæmd til að greiða konu 19 milljónir króna vegna kynbundins launamunar milli launa hennar og karla í stöðu lögmanna hjá stofnuninni.

Í þeim dómi kom fram að svokallaðir „skúffusamningar“ hefðu verið gerðir við karlkyns starfsmenn stofnunarinnar um hærri laun þeim til handa.

Mörg hneykslismál

Hneykslismál hafa plagað Innheimtustofnunina undanfarin ár. En í apríl 2022 voru Jón Ingvar Pálsson forstjóri og Bragi Axel Rúnarsson forstöðumaður reknir úr starfi. Ástæðan sem gefin var upp voru alvarleg broti í starfi og vanefndir á samningi vegna trúnaðarbrots. Þeir höfðu verið sendir í leyfi í desember árið 2021 í kjölfar úttektar Ríkisendurskoðunar á verkefnum stofnunarinnar.

Í umfjöllun DV um stofnunina árið 2019 kom fram að fyrrverandi starfsmenn Innheimtustofnunar hefðu vitnað til um andlegt ofbeldi, einelti, ógnarstjórnun, yfirgang gegn konum, margföld trúnaðarbrot og furðuleg afskipti af einkalífi starfsfólks.