Enn lítið vitað um leyniskyttuna og til­efni á­rásarinnar í Dallas

Einn þeirra dó en enginn löggæslumaður varð fyrir skoti. Jahn er einnig sagður hafa skotið margsinnis í bygginguna sjálfa, af nærliggjandi húsi þar sem lík hans fannst eftir á. Hann er sagður hafa svipt sig lífi.

Heimavarnaráðuneyti Bandaríkjanna sagði í gær að tveir mannanna sem urðu fyrir skotum hefðu dáið en það var síðar dregið til baka. Einn þeirra dó en hinir tveir eru sagðir í alvarlegu ástandi á sjúkrahúsi.

Enn sem komið er hafa yfirvöld í Bandaríkjunum veitt litlar upplýsingar um árásina, eins og til dæmis hver árásarmaðurinn var. Þær upplýsingar höfðu fjölmiðlar vestanhafs eftir heimildarmönnum sínum en það var svo seinna meir staðfest af stjórnendum ICE.

Leiðtogar heimavarnaráðuneytis og Alríkislögreglu Bandaríkjanna hafa þó haldið því fram að árásin sé pólitísks eðlis og að hún hafi beinst að útsendurum ICE, þó enginn þeirra hafi verið fyrir skoti. Því til stuðnings birti Kash Patel, yfirmaður FBI, mynd af skotum sem eiga að hafa fundist við hlið líki árásarmannsins og var búið að skrifa „Anti-Ice“ á eitt skotið.

Sú myndbirting og yfirlýsing Patel þótti mjög svo óvanaleg, einungis nokkrum klukkustundum eftir árásina.

Uppfært: Patel hefur birt færslu þar sem hann segir að Jahn hafi leitað upplýsina um útsendara ICE og skrifað niður að hann vonaðist til þess að hann gerði starfsmenn stofnunarinnar lafandi hrædda. Svo virðist sem að Jahn hafi skipulagt árásina vel.

Þrátt fyrir yfirlýsingar Patels og annarra hefur fátt litið dagsins ljós sem gefur til kynna nákvæmlega hvert tilefni árásarinnar var. Eins og nýlegt dæmi gefur til kynna, í tilfelli morðsins á Charlie Kirk, er ekki sjálfgefið að marka megi hvað árásarmenn sem þessir skrifa á skot sín.

Sjá einnig: Rýnt í ákærurnar - „Ég fékk nóg af hatri hans“

Í stuttu máli sagt er oft um að ræða tilvísanir í tölvuleiki og spjallþræði á internetinu sem gæti verið einkahúmor eða kaldhæðni. Oft er erfitt fyrir óinnvígða að greina skilaboð sem þessi, ef þetta eru yfir höfuð skilaboð.

Lýst sem stefnulausum

AP fréttaveitan segir að eftir árásina í gær hafi útsendarar FBI komið saman við heimili í úthverfi Dallas, þar sem Jahn á að hafa búið hjá foreldrum sínum. Talsmaður nærliggjandi háskóla sagði fréttaveitunni að Jahn hefði verið í námi þar á tímabilum milli 2013 og 2018.

Hann var 29 ára gamall.

Árið 2017 er Jahn sagður hafa keyrt þvert yfir Bandaríkin, til Washingtonríkis, þar sem hann tók að sér láglaunastarf í maríjúanarækt. Eigandi þeirrar ræktunar sagði AP að Jahn hafi virst algerlega stefnulaus í lífinu og að á þessum tíma hafi hann sofið í bíl sínum.

Blaðamenn New York Times hafa fundið tvo reikninga á Reddit sem Jahn notaðist við en þar skrifaði hann nánast eingöngu um tölvuleiki, bíla, þættina South Park og marijúana.

Þá hefur heldur ekki komið í ljós hverjir urðu fyrir skoti en heimildarmenn fjölmiðla segja þá hafa verið í sendiferðabílnum en þar gætu þeir hafa verið fastir í handjárnum. Þá tók hann þátt í forvali Demókrataflokksins í Texas árið 2020 en að öðru leyti virðist hann hafa verið skráður sem óháður kjósandi.

Jahn var ákærður fyrir að selja marijúana árið 2015 en að öðru leyti virðist hann ekki hafa komið við sögu lögreglu, samkvæmt NYT.

Segja hótunum hafa fjölgað

Störf ICE eru verulega umdeild þessa dagana, þar sem starfsmenn stofnunarinnar hafa handtekið fólk víðsvegar um Bandaríkin fyrir að halda þar til ólöglega. Starfsmenn eru oftar en ekki grímuklæddir og þungvopnaðir og hafa fjölmargar fréttir borist af því að þeir hafi einnig handtekið bandaríska ríkisborgara.

Donald Trump, forseti Bandaríkjanna, hefur gert það að vísa eins mörgu fólki sem dvelur ólöglega í Bandaríkjunum úr landi eins og hann getur að einu helsta markmiði ríkisstjórnar sinnar.

Víðsvegar um Bandaríkin hefur komið til mótmæla vegna starfa ICE og ráðamenn í Bandaríkjunum segja hótunum og ofbeldi í garð þeirra hafa fjölgað gífurlega mikið.