Tveir nýir stjórn­endur hjá Símanum

Þetta kemur fram í tilkynningu frá fjarskiptafyrirtækinu þar sem segir að Hjörtur Þór taki við starfi fjármálastjóra af Óskari Haukssyni sem hefur ákveðið að láta af störfum um mánaðamótin. Fram kemur í tilkynningunni að Hjörtur hafi starfað hjá Íslandsbanka undanfarin nítján ár, meðal annars sem forstöðumaður á fyrirtækjasviði og sem forstöðumaður á sviði fyrirtækja og fjárfesta. Áður starfaði hann í fimm ár sem lána- og fjárfestingastjóri hjá UPS Capital í Bandaríkjunum.

„Hjörtur hefur lokið B.Sc. gráðu í viðskiptafræði frá Hartford háskóla í Connecticut og M.A. gráðu í hagfræði frá Trinity College í sama fylki Bandaríkjanna. Þá hefur Hjörtur einnig lokið námi í stjórnun frá Wharton Business School og prófi í verðbréfaviðskiptum,“ segir ennfremur um bakgrunn Hjartar í tilkynningunni. 

Sæunn Björk tekur við starfi framkvæmdastjóra fyrirtækjasviðs af Vésteini Gauta Haukssyni sem einnig hefur ákveðið að láta af störfum, en Vésteinn verður forstjóra áfram til ráðgjafar á næstu mánuðum. Sæunn gegndi áður starfi forstöðumanns innkaupa-, vörustýringar og upplýsingatækni hjá Controlant þar sem hún hóf störf árið 2021. Áður hefur hún gegnt ýmsum stjórnendastöðum hjá Eimskip, síðast sem forstöðumaður innkaupastýringar og kostnaðareftirlits, en þar á undan meðal annars sem deildarstjóri í Hamborg og ferlastjóri félagsins. Þar að auki hefur hún setið í ýmsum stjórnum fyrirtækja.

„Sæunn hefur lokið B.Sc. gráðu í viðskiptafræði frá Háskóla Íslands og M.Sc. gráðu í alþjóðastjórnun frá Strathclyde University í Glasgow,“ segir í tilkynningunni. „Samhliða stjórnendabreytingum verða gerðar skipulagsbreytingar á fyrirtækjasviði, en auglýsingamiðlun færist frá sviðinu og heyrir beint undir forstjóra.“

María Björk Einarsdóttir, forstjóri Símans, fagnar ráðningu Hjartar og Sæunnar og býður þau velkomin til starfa um leið og hún þakkar þeim Óskari og Vésteini fyrir sín störf.