Birgir til Banana

Í fréttatilkynningu þess efnis segir að Birgir Hrafn búi yfir tveggja áratuga reynslu af stjórnun og ráðgjöf. Hann hafi síðast starfað sem sjálfstætt starfandi ráðgjafi og þar áður sem forstöðumaður á rekstrarsviði hjá Controlant og deildarstjóri vöruhúsa og dreifingar hjá Distica. Þá hafi hann starfað í rúm tíu ár sem ráðgjafi á sviði rekstrar, fjármála og aðfangakeðju hjá Capacent, þar sem hann hafi leitt fjölmörg umbóta- og rekstrartengd verkefni fyrir fjölbreyttan hóp fyrirtækja.

Birgir Hrafn sé með MBA-gráðu frá Virginia Tech með áherslu á fjármál og fjárfestingar, auk B.Sc.-gráðu í tölvunarfræði frá Háskóla Íslands. Hann hafi einnig lokið prófi í verðbréfaviðskiptum og stjórnendamarkþjálfun frá Háskólanum í Reykjavík.

„Það er okkur mikill liðsstyrkur að fá Birgi Hrafn í framkvæmdastjórn Banana. Víðtæk reynsla hans og þekking mun nýtast fyrirtækinu afar vel í áframhaldandi vexti og þróun,“ er haft eftir Jóhönnu Jónsdóttur, framkvæmdastjóra Banana.