Pósturinn hættir að senda til Banda­ríkjanna á mánu­daginn

Í fréttatilkynningu þess efnis frá Póstinum segir að fjöldi póstfyrirtækja hafi ákveðið að stöðva vörusendingar til Bandaríkjanna vegna breytinganna og megi þar til dæmis nefna PostNord og Austrian Post.

„Okkur þykir leitt að þurfa að taka þessa ákvörðun en við eigum ekki annarra kosta völ eins og staðan er núna. Málið er ákaflega flókið og mörg tækniatriði sem þarf að huga að ef þessar fyrirhuguðu breytingar verða að veruleika 29. ágúst næstkomandi eins og bandarísk stjórnvöld hafa gefið út. Við erum búin að leita allra mögulegra ráða til að leysa þetta en sjáum ekki fram á að það náist fyrir fimmtudaginn. Því var ákveðið að grípa til þess ráðs að loka tímabundið fyrir vörusendingar til Bandaríkjanna,“ er haft eftir Þórhildi Ólöfu Helgadóttur, forstjóra Póstsins,.

Pósturinn muni áfram taka við bréfum, skjölum og sendingum til Bandaríkjanna sem innihalda gjafir milli einstaklinga að hámarksverðmæti 100 Bandaríkjadala, eða um 12.400 króna 

„Við erum á fullu að vinna að því að finna tæknilausn á málinu og upplýsum viðskiptavini okkar um leið og einhverjar breytingar verða.“

Þess megi geta að viðskiptavinir Póstsins sem hyggjast senda vörusendingar til Bandaríkjanna áður en fyrirhugaðar breytingar taka gildi þurfi að koma sendingunum í póst fyrir klukkan 12:00 mánudaginn 25. ágúst næstkomandi.