Má ekki koma inn í í­þrótta­hús í tíu mánuði

Dimitris Giannakopoulos, eigandi Panathinaikos, var dæmdur í tíu mánaða bann frá öllum íþróttahúsum Grikklands eftir framkomu sína á leik tvö í úrslitaeinvígi Panathinaikos og Olympiacos.

Staðan er 1-1 í einvíginu en forráðamenn deildarinnar þurftu að fresta leik þrjú á meðan mál Giannakopoulos var tekið fyrir.

Giannakopoulos fékk einnig tuttugu þúsund evru sekt og félagið hans fékk að auki 44 þúsund evru sekt. Tuttugu þúsund evrur eru um 2,9 milljónir króna en 44 þúsund evrur eru 6,3 milljónir íslenskra króna.

Atvikið gerðist 1. júní en mikið hefur gengið á milli eiganda félaganna tveggja sem saka hvorn annan um ýmislegt.

Giannakopoulos fer í bann fyrir mjög óviðeigandi hegðun sína en hann fór inn á völlinn til að hrauna yfir eiganda Olympiacos og segja meðal annars mjög ljót orð um hann og dóttur hans.

Giannakopoulos hótaði forseta Olympiacos ítrekað og var gjörsamlega trítilóður inn á vellinum.

Panathinaikos hélt því fram að þetta hafi allt byrjað vegna þessa að stuðningsmenn Olympiacos fóru að kalla ljót orð í átt að Giannakopoulos og fjölskyldu hans.

Gríska körfuboltsambandið hafði frestað úrslitaeinvíginu en eftir þennan dóm þá mun það halda áfram. Staðan er 1-1 en það lið sem fyrr vinnur þrjá leiki verður grískur meistari.