Þurfa að gefa út á­kæru á morgun ef gæsluvarðhaldið á að vera lengra

Þetta staðfestir Karl Ingi Vilbergsson í samtali við fréttastofu. Hann segir að ákvörðun um útgáfu ákæra á hendur mönnunum muni liggja fyrir á morgun.

Þar sem að fyrirhugað er að krefjast frekara gæsluvarðhalds er hægt að leiða líkur að því að sakborningarnir verði ákærðir, en til þess að hafa þá lengur í gæsluvarðhaldi þarf ákæra að liggja fyrir þar sem tólf vikur eru liðnar síðan þeir voru fyrst úrskurðaðir í gæsluvarðhald.

Líkt og áður segir eru þrír sakborningar enn í haldi, en fleiri hafa haft réttarstöðu sakbornings við rannsókn málsins og hugsanlegt að fleiri en þessir þrír verði ákærðir.

Málið varðar andlát Hjörleifs Hauks Guðmundssonar, 65 ára, sem fannst snemma að morgni þriðjudagsins 11. mars við göngustíg í Gufunesi í Reykjavík. Hann var þungt haldinn og lést skömmu eftir komu á slysadeild Landspítalans.

Greint hefur verið frá því að til rannsóknar hafi verið frelsissvipting, fjárkúgun og manndráp.