Fékk rætin skila­boð vegna veð­mála eftir að hafa klikkað á vítum

Fjöldi Íslendinga sem stundar fjárhættuspil á netinu hefur fjórtánfaldast á tuttugu árum. Þá er orðið algengara en áður að fólk alls staðar í heiminum veðji á íslenska kappleiki. 

Íþróttafólk á Íslandi hefur fundið fyrir þessu og hefur oft fengið send skilaboð í tengslum við leiki sína. Þeirra á meðal er Hörður Axel körfuboltamaður. Hann var á tímabili landsliðsfyrirliði og spilaði í útlöndum þar á meðal í Þýskalandi og á Spáni. Hann lauk ferli sínum á dögunum þegar hann tók þátt í úrslitakeppninni með Álftanesi

„Ég fékk til dæmis skilaboð eftir leikinn á móti Njarðvík þegar við komumst áfram sem að voru skrýtin og hef fengið svona í gegnum tíðina mjög reglulega skilaboð frá einhverjum sem hefur augljóslega verið að veðja á leikinn og tapað á honum.“

Hann segir skilaboðin oft rætin líkt og þau sem honum bárust eftir leikinn gegn Njarðvík.

„Í þessu tilfelli var hann að veðja á það að við myndum hitta úr x mörgum vítum í leiknum liðið og þá klikkaði ég á tveimur vítum sem varð til þess að hann náði ekki sínu veðmáli og þá fékk ég þessi skilaboð í kjölfarið.“

Óþægilegt þegar skilaboðum er beint að börnunum

Í einhverjum tilfellum hafa honum borist alvarlegar hótanir.

„Líflátshótanir og svo hérna líka verið að bauna yfir mann og svo hef ég fengið líflátshótanir við börnin mín og fjölskyldu og annað.“

Slík skilaboð skilji eftir sig ónotatilfinningu.

„Þótt að maður vita að það sé ekkert á bak við þessi skilaboð en þá er þetta óþarfi og óþægilegt. Sérstaklega þegar verið er að hóta eins og börnunum manns og annað og líka það að heimurinn hefur minnkað það mikið að maður er rosa aðgengilegur. Það að einhver maður úti í heimi viti að maður eigi börn og finnist eitthvað við þau að sakast finnst mér fyrir neðan allar hellur.“

Hann segir flest skilaboðin koma frá þeim sem eru að veðja á leikina úti í heimi.

„Þetta var mun algengara þegar ég var að spila erlendis en á sama tíma hérna heima þá hefur þetta aukist en ég hef aldrei fengið svona skilaboð frá íslenskum aðila en þetta er allt á ensku og einhverjir tilbúnir prófílar. Ég hef fengið skilaboð frá þeim sem eru að veðja á Íslandi en bara í rauninni til að spyrja út í heilsu leikmanna og öðru því tengdu til þess að geta gert upp hug sinn hvort þeir eiga að veðja á leikina eða ekki.“

Hörður tekur á morgun þátt í málþingi á vegum ÍSÍ, UMFÍ, ÍBR og KSÍ þar sem rætt verður um veðmál og íþróttir og hversu fyrirferðarmiklar erlendar veðmálasíður eru að verða á Íslandi. Málþingið verður haldið í húsnæði KSÍ og hefst klukkan 17:00.

Hætti eftir að hafa veðjað á hornspyrnur í Suður-Kóreu

Hann segir áhyggjuefni hvernig veðmálaheimurinn sé að þróast. Hann hafi rætt þessi mál í klefanum nokkrum sinnum og upplifi að margir leikmenn eigi erfitt með að ræða þetta.

„Ef maður talar við einn og einn þá hefur oft komið upp á yfirborðið eitthvað sem aðrir hafa fengið. Ég veit ekki hvort þetta sé feimnismál eða hvað en þetta er yfirleitt eitthvað tengt sem þér hefur mistekist.“

Hann segist ekki vera á móti veðmálum en mikilvægt sé að fara varlega. Sjálfur hafi hann veðjað um tíma en hætt því þegar hann áttaði sig á því að hann var farinn að veðja á hornspyrnur í Suður-Kóreu þrátt fyrir að hafa aldrei heyrt um liðið og fylgjast ekki með fótbolta. 

„Þetta þarf að vera innan mjög skynsamlegra marka til þess að fara ekki fram úr sér. Inni á mörgum af þessum síðum er hægt að veðja á nánast allt. Það er hægt að velja á klikkuð skot og það er hægt að veðja hversu margar stoðsendingar þú tekur eða fráköst. Þannig að þetta er alveg varasamur heimur.“