Hent nauðugri út úr hryllings­húsi vegna ógreiddrar leigu

Jón, sem titlar sig gamalmenni, segir að á morgun muni Félagsbústaðir henda dóttur sinni fíklinum út á götu. Þetta kemur fram í aðsendri grein sem Vísir birti nú rétt í þessu. Hann segir Bríetartún 20 ekki geta kallast mannabústaður.

Aðrir íbúar búi við ógn og skelfingu

„Íbúarnir í þessum stigagangi búa við stöðugan ótta og öryggisleysi. Á sínum tíma komu Félagsbústaðir upp öryggismyndavélum í stigaganginum, en einn íbúinn, er löngu búinn að klippa á allar leiðslur sem að þeim liggja. Íbúinn er vel þekkt síbrotakona, sem veður vopnuð um stigaganginn og axarför og aðrar skemmdir eftir hana má sjá hér og hvar, m.a. á hurðinni að íbúð dóttur minnar. Dyrnar eru reyndar svo laskaðar eftir ítrekuð innbrot, að í íbúðin stendur nánast opin.“

Jón segir að frá því að Félagsbústaði úthlutuðu konunni íbúð í húsinu hafi aðrir íbúar þar búið við stöðuga skelfingu en konan hafi með geðofsa sínum, síendurteknum skemmdarverkum og innbrotum bæði í aðrar íbúðir í húsinu og geymslur í sameign hússins.

Segir af nauðgun sem dóttir hans varð fyrir

„Meðal afreka hennar má telja innbrot til dóttur minnar fyrir rúmum tveimur árum. Þá var hún í fylgd með einhverjum karlkyns félögum sínum, sem nauðguðu dóttur minni „í öll göt“ svo notuð séu hennar eigin orð, misþyrmdu henni og skildu við hana svo hart leikna að það leið langur tími, mögulega sólarhringur eða meira, hélt hún sjálf, þangað til hún komst til sæmilegrar meðvitundar.“

Jón segir að dóttir hans hafi vitaskuld kært þann atburð til lögreglu, eða reyndi það allavega, en hann hafi ekki neinar spurnir af því að þeirri kæru hafi verið sinnt.

„Síbrotakonan hefur auðvitað verið kærð til lögreglu miklu oftar, enda líka verið staðin að ýmsum ójöfnuði, m.a. ítrekað að þjófnaði í verslunum.“

Jón segir að hvorki lögregla né Félagsbústaðir hafi aðhafst nokkurn skapaðan hlut. „Ef ástæðan er skortur á sönnunum er það augljós fyrirsláttur. Sannleikurinn er öllu fremur sá að ekkert hefur verið aðhafst til að afla sannana.“

Skorar á lögreglu að beita sér í málinu

Jón segir að það ætti ekki að vera neitt tiltökumál. Hann kvartar undan áhugaleysi fjölmiðla en nefnir þó að DV hafi birt af þessu fréttir, þá síðustu nú um helgina. Þar sé vísað í viðmælendur sem gætu borið vitni ef lögregla hefði minnsta áhuga á málinu og manndóm í að láta sig þetta skipta.

Jón segir enga ástæðu til að halda hlífiskyldi yfir sökudólgnum, verið sé að refsa fórnarlömbum sem megi heita sannkallað níðingsverk. Hann skorar á framkvæmdastjóra Félagsbústaða ásamt formann og framkvæmdastjóra Velferðarráðs borgarinnar að stöðva þessa boðuðu aðgerð án tafar og sjá til þess að Félagsbústaðir og lögreglan rannsaki málið án tafar.

Vísir gerði tilraun til að ná í einhvern hjá Félagsbústöðum en það var eins og að vera í falinni myndavél. Eftir að hafa beðið lengi á línunni, og talið niður kom að endingu símasvari á ensku þar sem sagt var eitthvað á þá leið að maður væri kominn á endastöð!