Rykið dustað af sólbekkjunum

Sólríkt verður og hægur vindur víða á landinu í dag. Hiti er á bilinu níu til fjórtán stig og því ljóst að fjöldi fólks ákveði að skella sér í sund. Steinunn Lóa Lárusdóttir, laugarvörður í Laugardalslaug segir morguninn hafa verið annasaman hjá starfsmönnum laugarinnar.

„Við erum svona Íslendingarnir alveg að nýta hverja mínútu í sólinni sem best til að fá gott tan,“ segir hún.

Steinunn segist ekki búast við öðru en að aðsókn verði mikil fram eftir degi. Á meðan sólin skín fer fólk í sund. Hún segir sólbekki laugarinnar þegar tekna í gagnið.

„Ég hvet alla til að fara í sund eða bara vera úti í dag og nýta þetta góða veður til fulls,“ eru skilaboð Steinunnar Lóu Lárusdóttur laugarvarðar á þessum fallega degi.