Geimferðin gagn­rýnd: „Mér býður við þessu“

New Shepard er í eigu geimflugfélagsins Blue Origin sem milljarðamæringurinn Jeff Bezos stofnaði og hefur skotið ellefu mönnuðum geimflaugum á loft frá aldamótum.

Áhöfn geimfarsins var skipuð sex konum: Aishu Bowe, flugvélaverkfræðing; Amöndu Nguyen, aðgerðasinna; Gayle King, sjónvarpskonu hjá CBS; poppsöngkonunni Katy Perry; Kerianne Flynn, sjónvarpsframleiðanda og Lauren Sánchez, blaðamanni.

Valentina Tereshkova var fyrsta konan sem fór út í geim árið 1963 þegar hún flaug með Vostok 6 í tæpa þrjá daga í kringum jörðina. Þar sem hún var ein um borð má segja að þar hafi verið fyrsta alkvenkyns áhöfnin. Í tilfelli New Shrepard er þar á ferðinni fyrsta kvenkyns áhöfnin með fleiri en einum geimfara.

Sánches leiddi leiðangurinn en auk þess að vera fyrrverandi fréttakona og þyrluflugmaður er hún eiginkona áðurnefnds Jeff Bezos, stofnanda Blue Origin. Í tilkynningu frá geimflugfélaginu segir að Sánchez að hafi fengið hinar fimm til liðs við verkefnið.

Geimfarið tók á loft um hálf tvö á íslenskum tíma í gær og var um ellefu mínútur í loftinu. Geimfarið fór hæst í um 100 kílómetra fjarlægð frá jörðu og var áhöfnin í þrjár mínútur í þyngdarleysi. Hylkið sveif síðan til jarðar með fallhlífum.

Fjöldi fólks var mættur á vettvang til að fylgjast með geimskotinu, þar á meðal Daisy, dóttir Perry; Oprah Winfrey, besta vinkona King og mæðgurnar Kris Jenner og Khloé Kardashian. Víða um heim var geimskotinu fagnað en það hefur líka verið gagnrýnt töluvert.

Tilgangslaus græðgi

Ein sú fyrsta til að gagnrýna geimskotið opinberlega var leikkonan Olivia Munn sem velti því fyrir sér fyrr í mánuðinum hvort þörf væri á geimferðinni.

„Ég veit að það er ekki töff að segja þetta, en það eru svo margir aðrir hlutir sem eru mikilvægir í heiminum í dag,“ sagði hin 44 ára Munn í sjónvarpsþættinum Today with Jenna and Friends.

„Hvað ætlið þið að gera í geimnum? Hvað ætlið þið að gera þarna uppi?“ spurði hún. Fannst henni undarlegt að milljónamæringur væru á leið upp í geim þegar meðal Bandaríkjamaður „ætti ekki efni á eggjum“.

„Hver er tilgangurinn? Er það sögulegt að þið séuð að fara í geimtúr? Mér finnst þetta dálítið gráðugt,“ sagði hún í þættinum. „Geimkannanir voru til að auka þekkingu okkar og hjálpa mannkyninu. Hvað ætla þau að gera þarna upp sem gerir það betra fyrir okkur hérna niðri.“

Þykjast vera annt um jörðina í flaug frá umhverfissóðum

Önnur sem gagnrýndi geimskotið var fyrirsætan og leikkonan Emily Ratajkowski sem birti myndband á TikTok í gær þar sem hún þusaði yfir geimskotinu og sagði það vera „handan paródíu“.

„Að segja að þér sé annt um Móður jörð og að þetta snúist um Móður jörð. Og þú ferð inn í geimflaug sem er byggð og fjármögnuð af fyrirtæki sem er eitt síns liðs að eyðileggja plánetuna. Sjáðu ástandið á heiminum og hugsaðu hvað það kostar miklar auðlindir að koma þessum konum út í geim. Til hvers? Hver var markaðssetningin þarna,“ sagði Ratajkowski.

„Og síðan reyna að láta það... Mér býður við þessu. Bókstaflega, mér býður við þessu,“ sagði hún einnig.

Meme fyrir milljarð dala

Enn önnur sem gagnrýndi geimskotið var Olivia Wilde, leikkona og leikstjóri, sem deildi meme-i um áhöfnina í Instagram-hringrás sinni.

Þar mátti sjá tvær myndir af Katy Perry koma út úr geimskutlunni, annars vegar þar sem hún hélt á blómi og hins vegar þar sem hún kyssti jörðina. Við þær stendur: „Að koma úr áætlunarflugi árið 2025.“

Við færsluna skrifaði Wilde: „Milljarður dala kaupir þér greinilega nokkur góð meme.“