Verð­fall á Wall Street

Umtalsverðar lækkanir áttu sér einnig stað á mörkuðum í öðrum hlutum heimsins fyrr í dag.

Nasdaq-vísitalan átti í gær sinn versta dag frá 2020 og hefur hún haldið áfram að lækka í dag. Á einungis nokkrum dögum hefur vísitalan lækkað um rúman fimmtung og er þá talað um að verðfall hafi átt sér stað eða talað um „bjarnamarkað“.

Russell 2000 vísitalan, fyrir smærri bandarísk fyrirtæki, hefur einnig fallið um fimmtung. S&P 500 hefur einnig lækkað töluvert og er um fimmtán prósentum lægri, miðað við nýlegan hápunkt hennar.

Tvær stórar ástæður

Wall Street Journal segir að í grunninn megi rekja stóran hluta óreiðunnar til tveggja ástæðna. Önnur þeirra sé sú staðreynd að fjárfestar hafi verið búnir að verja miklum peningum í Bandaríkjunum að undanförnu, vegna þróunar gervigreindar og uppvaxtar stærstu tæknifyrirtækja landsins, svo eitthvað sé nefnt.

Virði tæknirisanna sjö, Alphabet, Amazon, Apple, Microsoft, Meta, Nvidia og Tesla hafi aukist verulega. Þessi félög táknuðu þegar mest var um rúman þriðjung hlutabréfaköku Bandaríkjanna, ef svo má að orði komast, og hlutabréfamarkaður Bandaríkjanna rúmlega þrír fjórðu af virði markaða heimsins.

Vonir um að Donald Trump, forseti Bandaríkjanna, myndi auka hagvöxt með skattalækkunum og með því að fella niður reglugerðir og aðra tálma úr vegi fyrirtækja hafa ekki raungerst. Þess í stað hefur Trump einbeitt sér að fólksflutningum, tollum og uppsögnum opinberra starfsmanna.

Hinn vendipunkturinn er samkvæmt WSJ sá að tollar Donalds Trump, forseta Bandaríkjanna, séu að draga verulega úr áhuga fjárfesta á bandarískum mörkuðum.

Markmið Trumps virðist vera að flytja framleiðslu til Bandaríkjanna. Að sannfæra forsvarsmenn fyrirtækja um að opna verksmiðjur í Bandaríkjunum og framleiða vörur sínar þar og þannig draga úr viðskiptahalla Bandaríkjanna við önnur ríki.

Þetta gæti bæði haft slæm áhrif á hlutabréfamarkaði í Bandaríkjunum.

Það að flytja verksmiðjur til Bandaríkjanna myndi kosta fyrirtæki mikla peninga og framleiðsla þeirri yrði þar að auki mun dýrari.

Í grein WSJ segir einnig að með minni viðskiptahalla myndi draga úr fjárfestingum í Bandaríkjunum til lengri tíma.

„Frábær tími til að verða ríkur“

Olíuverð hefur lækkað hratt á undanförnum dögum og hefur ekki verið lægra í nærri því fjögur ár. OPEC-ríkin svokölluðu og bandamenn þeirra í OPEC+ ætla að auka framleiðslu og þar að auk óttast greinendur að tollar Trumps og mögulegar hefndaraðgerðir muni draga úr efnahagsumsvifum á næstunni.

Trump, sem er staddur í Flórída, birti skilaboð á Truth Social, hans eigin samfélagsmiðli, þar sem hann sagði að nú væri frábær tími til að auðgast. Þessi skilaboð sendi hann til „þeirra mörgu“ fjárfesta sem streymdu til Bandaríkjanna og sagði að stefnumál hans myndu aldrei breytast.