Þór­ey aftur inn í lands­liðið: „Þurftum bara að­eins að hreinsa and­rúms­loftið“

Valur vann Iuventa 30-20 í síðari leik liðanna eftir að hafa tapað fyrri leiknum með tveimur mörkum ytra. Framundan er úrslitaviðureign gegn Bm Porrino í maí, tveggja leikja einvígi í úrslitum Evrópubikarsins. Í leiknum á sunnudaginn skoraði Þórey átta mörk.

„Fyrir tímabilið hugsaði maður aldrei svona langt en bara ótrúlega gaman að vera komin á þennan stað. Þetta var klárlega okkar langbesta frammistaða núna í vetur en það sem hjálpaði var að þetta var á heimavelli með fullt af áhorfendum og mikið gert í kringum þetta. Það gaf okkur byr undir báða vængi og þá ákváðum við að gera þetta bara almennilega og vinna þær með tíu,“ segir Þórey í Sportpakkanum á Stöð 2 í gærkvöldi.

„Stjórnin og allir í kringum Val á bara stórt hrós skilið fyrir að gera þetta svona ótrúlega vel. Og allir sem mættu, bara takk kærlega fyrir.“

Athygli vakti á dögunum að Þórey Anna Ásgeirsdóttir mætt aftur í landsliðið en hún gaf ekki kost á sér í liðið fyrir Evrópumótið undir lok síðasta árs þar sem að hún var óánægð með sitt hlutverk í landsliðinu. Framundan eru tveir umspilsleikir gegn Ísrael í apríl.

„Landsliðsþjálfarinn [Arnar Pétursson] hafði bara samband við mig og við tókum bara góðan fund og niðurstaðan úr þeim góða fundi var að ég myndi koma aftur inn í þetta. Ég er bara mjög ánægð með þá ákvörðun og mjög spennt fyrir þessu verkefni sem er framundan í apríl. Við þurftum bara aðeins að hreinsa andrúmsloftið sem gekk vel.“