Handbolti

Elvar marka­hæstur í endur­komu úr meiðslum

Ágúst Orri Arnarson skrifar
Elvar Örn Jónsson hefur verið meiddur síðastliðinn mánuð og missti meðal annars af landsleikjum Íslands við Grikkland. Melsungen hefur saknað hans mikið. 
Elvar Örn Jónsson hefur verið meiddur síðastliðinn mánuð og missti meðal annars af landsleikjum Íslands við Grikkland. Melsungen hefur saknað hans mikið.  Getty/Swen Pförtner

Elvar Örn Jónsson sneri aftur úr mánaðarlöngum meiðslum og var markahæstur í 27-22 sigri Melsungen gegn THW Kiel í þýsku úrvalsdeildinni í handbolta. Elvar skoraði sex mörk úr tíu skotum og gaf tvær stoðsendingar.

Arnar Freyr Arnarsson er enn frá vegna meiðsla og tók ekki þátt í leiknum.

Elvar Örn hafði ekki spilað síðan 1. mars en sneri aftur með látum og liðið, sem hafði tapað þremur af síðustu fjórum leikjum án Elvars, tók vel við sér.

Um var að ræða slag milli liðanna í þriðja og fjórða sæti deildarinnar og leikurinn því lengst af mjög jafn. Á lokamínútunum voru heimamenn Melsungen hins vegar mun sterkari aðilinn, og ekki var stemningin í stappfullri höllinni að skemma fyrir.

Melsungen brunaði fram úr og breytti stöðunni úr 20-20 í 26-21 á rétt tæpum tíu mínútum. Lokatölur urðu svo 27-22.

Síðan deildin hófst aftur eftir HM er Melsungen búið að missa toppsætið frá sér en ekki langt undan, í þriðja sæti og þremur stigum frá toppnum. Kiel er tveimur stigum á eftir í fjórða sætinu.

Viggó markahæstur í botnslagnum

Viggó Kristjánsson skoraði átta mörk fyrir Erlangen í 23-26 sigri á útivelli gegn Potsdam. Um er að ræða tvö neðstu lið þýsku úrvalsdeildarinnar. Potsdam hefur aðeins unnið einn leik en Erlangen er nú með átta stig, tveimur stigum frá næsta liði fyrir ofan.

Danski handboltinn

Guðmundur Bragi Ástþórsson, leikmaður Bjerringbro-Silkeborg, skoraði þrjú mörk og gaf eina stoðsendingu í 31-29 tapi á útivelli gegn TMS Ringsted.

Guðmundur Bragi Ástþórsson fór frá Haukum til Danmerkur síðasta sumar og hefur fest sig vel í sessi. Bjerringbro Silkeborg

Gestaliðið sem Guðmundur lék með átti slæman kafla um miðjan fyrri hálfleik og misstu heimaliðið þremur mörkum fram úr sér. Restin af leiknum fór í að elta þá forystu uppi og tókst vel, Guðmundur Bragi minnkaði muninn í aðeins eitt mark þegar tæpar fjórar mínútur voru eftir og aftur þegar rétt rúm mínúta var eftir, en heimaliðið stóðst pressuna sem það var sett undir og vann leikinn með tveimur mörkum.

Bjerringbro-Silkeborg situr í fimmta sæti dönsku úrvalsdeildarinnar þegar þrjár umferðir eru eftir, áður en úrslitakeppnin hefst.




Fleiri fréttir

Sjá meira


×