Smári Rúnar ráðinn fjár­mála­stjóri

Í fréttatilkynningu um vistaskiptin segir að Smári Rúnar sé reynslumikill rekstrarráðgjafi og komi til Eðalfangs frá Akrar Consult. Áður hafi hann starfað um árabil hjá Landsbankanum. Smári Rúnar hafi setið í stjórnum ýmissa félaga, svo sem Marel og Promens og sé í dag stjórnarmaður í hugbúnaðarfyrirtækinu Kaptio. Smári Rúnar sé hagfræðingur frá Háskóla Íslands.

Tekjur aukist um þriðjung

Þá segir að tekjur Eðalfangs-samstæðunnar hafi aukist um 33 prósent á milli áranna 2023 og 2024 og fjórfaldast frá árinu 2020, bæði í gegnum yfirtökur og innri vöxt. Sístækkandi hluti af framleiðslu fyrirtækisins fari á erlenda markaði en laxaafurðir úr vinnslu fyrirtækisins í Borgarnesi séu vinsælar víða um heim. Stóraukin fjárfesting í laxeldi, bæði á landi og í sjó, hafi rennt styrkari stoðum undir hráefnisöflun Eðalfangs. Félagið hafi fjárfest í nýjum flæðilínum og aukinni sjálfvirkni til að auka enn frekar afköst og hagkvæmni vinnslunnar.

Innkoma framtakssjóðsins Horn IV slhf. sem kjölfestufjárfestis í lok árs 2022 hafi verið lykill að áframhaldandi uppbyggingu félagsins og stutt við yfirtökur þess á félögum í sambærilegum rekstri. Horn IV slhf. sé í stýringu Landsbréfa.

Sterkt að fá inn reynslubolta

Haft er eftir Hinrik Erni Bjarnasyni, framkvæmdastjóra Eðalfangs að það sé sterkt fyrir Eðalfang að fá jafnreyndan mann og Smára Rúnar til liðs við félagið á þeirri vaxtarvegferð sem það sé á. 

„Í matvælaiðnaði skiptir nýting afurða og hagkvæmni í rekstri öllu máli og fjármálastjórinn leikur þar lykilhlutverk. Við höfum mikla trú á þeirri uppbyggingu sem á nú sér stað víða um land í eldi, bæði í sjó og á landi og sjáum mikil tækifæri í aukinni verðmætasköpun með fullvinnslu eldisafurða hér á landi. Eðalfang verður í lykilstöðu til að styðja við þá miklu uppbyggingu sem á sér stað í eldi á laxi hér á landi en fáir hafa jafn mikla reynslu í framleiðslu og sölu laxaafurða.“