Martin í hópnum sem gæti skilað Ís­landi á EM

Ísland mætir Ungverjalandi í Szombathely næsta fimmtudag, klukkan 17 að íslenskum tíma, og lýkur svo undankeppninni á að mæta Tyrklandi í Laugardalshöll næsta sunnudagskvöld klukkan 19:30 (miðasala er í gegnum Stubb).

Ísland er í 3. sæti B-riðils með sex stig, eftir tvo sigra og tvö töp, en gefin eru tvö stig fyrir sigur og eitt fyrir tap. Ítalía og Tyrkland eru efst með sjö stig hvort en Ungverjaland er neðst með fjögur stig. Ísland er í þessari góðu stöðu eftir sigurinn magnaða gegn Ítalíu ytra í nóvember.

Eru einu skrefi frá EM

Þrjú efstu liðin komast í lokakeppni EM. Þetta þýðir að ef að Ísland vinnur Ungverjaland, eða tapar með að hámarki fjögurra stiga mun (eftir 70-65 heimasigur Íslands fyrir ári), endar liðið fyrir ofan Ungverja og kemst á EM.

Ef Ísland tapar með meira en fimm stiga mun gegn Ungverjum þyrfti liðið að vinna Tyrkland til að komast á EM, eða treysta á að Ungverjaland tapaði fyrir Ítalíu á útivelli sama kvöld.

Martin er sá eini sem kemur nýr inn í hópinn nú, eftir leikina tvo við Ítalíu í nóvember. Fyrir þá leiki voru sautján leikmenn valdir í æfingahóp en þeir Frank Aron Booker, Hjálmar Stefánsson, Sigurður Pétursson og Þórir Guðmundur Þorbjarnarson eru ekki í þrettán manna hópnum sem Craig Pedersen valdi að þessu sinni.

Landsliðshópur Íslands:

Bjarni Guðmann Jónsson – Stjarnan – 3 leikir

Elvar Már Friðriksson - Maroussi Basketball Club – 72 leikir

Haukur Helgi Briem Pálsson – Álftanes – 76 leikir

Hilmar Smári Henningsson – Stjarnan – 18 leikir

Jón Axel Guðmundsson - Hereda San Pablo Burgos – 34 leikir

Kári Jónsson – Valur – 34 leikir

Kristinn Pálsson – Valur – 35 leikir

Martin Hermannsson – Alba Berlin – 75 leikir

Orri Gunnarsson – Stjarnan – 9 leikir

Sigtryggur Arnar Björnsson – Tindastóll – 35 leikir

Styrmir Snær Þrastarson - Belfius Mons-Hainaut – 18 leikir

Tryggvi Hlinason - Bilbao Basket – 67 leikir

Ægir Þór Steinarsson – Stjarnan – 89 leikir