Bónus ó­dýrari en Prís í fjögur skipti af fimm hundruð

Samkvæmt tilkynningu frá eftirlitinu segir að í einu tilfelli hafi vöruverð verið jafnt, í fjórum tilfellum hafi Bónus boðið upp á 25 prósent lægri vöru. Restin, eða 509 vörur, hafi verið 0,2 prósent til 48 prósent ódýrari í Prís.

„Stærsti verðmunurinn var á stóru heimilisbrauði Myllunnar, sem er tæplega helmingi ódýrara í Prís en í Bónus. Sá mikli munur skýrir hvers vegna verðbil milli Prís og Bónus er að meðaltali mest í flokknum brauð, eða tæp 12%. Aðrir flokkar sem eru umtalsvert ódýrari í Prís en Bónus eru sælgæti og snakk (7,9%), kaffi (7,8%) og gos (6,4%).

Allt frá sama merkinu

Þær fjórar vörur sem eru ódýrari í Bónus eru allar sósur frá Blå Bland – Aioli, grísk sósa, mexíkósk sósa og bernaise sósa. Þær kostuðu allar 298kr í Bónus en 399kr í Prís,“ segir í tilkynningunni.

Þá segir að Prís sé enn ódýrasta verslunin í reglulegum smanburði verðlagseftirlitsins, allt frá opnun hennar í ágúst. Verð þar hafi í janúar verið að meðaltali 1,93 prósent yfir lægsta verði, en í Bónus að meðaltali 3,81 prósent yfir lægsta verði.

Prís í sérflokki

„Prís sker sig úr og er, líkt og við opnun, nokkru undir verði annarra lágvöruverðsverslana. Sé miðað við að lágvöruverðsverslanir séu að meðaltali innan 10% frá lægsta verði, þá telja þær Prís, Bónus, Krónuna og Nettó.

Þegar skoðaðar eru þær 280 vörur sem fundust hjá öllum fjórum sést að Prís er 0,2% yfir lægsta verði að meðaltali en Bónus, Krónan og Nettó nær hvert öðru en Prís, milli 4,5-6,9% yfir lægsta verði að meðaltali,“ segir í tilkynningunni.