Segja um­fjöllun sem geri Car­b­fix tor­tryggi­legt fulla af rang­færslum

Heimildin birti í dag umfjöllun um kolefnisbindingarfyrirtækið Carbfix þar sem því er slegið upp að það hafi blekkt íbúa Hafnarfjarðar um umfang Coda Terminal, kolefnisförgunarstöðvar sem fyrirtækið vill reisa við Straumsvík og í Hafnarfirði. 

Á meðal viðskiptavina Coda Terminal eigi að vera stærsta sementsfyrirtækis heims sem hafi verið dæmt fyrir glæpi gegn mannkyninu vegna að þess að það lét undan fjárkúgun hryðjuverkasamtakanna Ríkis íslams í Sýrlandi.

Í yfirlýsingu Carbfix vegna umfjöllunar Heimildarinnar segir að engin áform séu um að dæla meiri koltvísýringi niður en fyrirtækið hafi sótt um. Ef áhugi væri á því í framtíðinni fæli það í sér nýtt verkefni sem þyrfti að leggja fyrir að nýju í umhverfismat og leyfisferla. Það sé rangt að fyrirtækið hafi haldið áformum um slíkt frá bæjaryfirvöldum í Hafnarfirði og íbúum.

Gert er ráð fyrir að Coda Terminal geti að hámarki bundið þrjár milljónir tonna af koltvísýringi árlega þegar hún verður fullbyggð í tillögu að breytingu á aðalskipulagi Hafnarfjarðar sem er í vinnslu hjá bænum.

Fari rangt með fjölda atriða

Fullyrðingar Heimildarinnar um að Carbfix hafi haldið áformum sínum „leyndum“ fyrir Hafnfirðingum virðast byggjast á drögum að fjárfestakynningu frá 2023 þar sem rætt var um möguleika á umfangsmeiri starfsemi í framtíðinni. Í myndbandi sem Heimildin tengir sjálf við umfjöllun sína heyrist framkvæmdastjóri Carbfix taka fram að allt umfram það sem hefur þegar verið sótt um leyfi fyrir í Hafnarfirði yrði nýtt verkefni.

Þá segir Carbfix í yfirlýsingu sinni að Heimildin fari rangt með stöðu viðræðna í fjárfestingaferli Coda Terminal-verkefnisins, viðskiptasambönd og viljayfirlýsingar og að ályktanir séu dregnar í umfjölluninni sem standist ekki skoðun.

„Carbfix hefur átt samtöl við fjöldan allan af fyrirtækjum sem losa CO2 og í mörgum tilfellum neitað viðskiptum og frekara samstarfi,“ segir í yfirlýsingunni.

Sautján milljarða króna styrkur frá ESB

Coda Terminal-verkefnið byggist á tækni Carbfix sem var þróuð við Hellisheiðarvirkjun og gengur út á að dæla uppleystum koltvísýringi niður í berglög þar sem hann binst í steindum nær varanlega. Í Hafnarfirði á að taka á móti koltvísýringi á fljótandi formi frá Evrópu og dæla honum í jörðu. Koltvísýringurinn sem á að farga kemur frá iðnferlum þar sem erfitt er að koma í veg fyrir koltvísýringslosun.

Carbfix fékk sautján milljarða króna styrk frá Evrópusambandinu til að byggja upp Coda Terminal sem er hæsti styrkur sem íslenskt fyrirtæki hefur fengið úr sjóðum þess.

Hávær andstaða hefur verið við Coda Terminal-verkefnið í Hafnarfirði, meðal annars frá íbúum sem telja niðurdælingarholur eiga að vera of nærri íbúabyggð. Til tals hefur komið að halda íbúakosningu um verkefnið.