Standa vörð um bíla­stæði við­skipta­vina Kringlunnar

Lengri opnunartími í aðdraganda jóla tók gildi í Kringlunni á mánudaginn. Opið verður frá klukkan tíu til klukkan 22:00 alla daga fram að jólum.

Inga Rut Jónsdóttir, framkvæmdastjóri Kringlunnar, segir að á venjulegum degi starfi um sex hundruð manns í húsinu en þeir séu fleiri nú rétt fyrir jólin þegar aukin mönnun er í verslunum. Margir komi á bíl.

Á meðan jólaopnun stendur yfir sé því beint til starfsfólks hússins að leggja annars staðar svo að bílastæði séu laus fyrir viðskiptavini. Kringlan hefur leigt stæði annars staðar og flytur starfsmennina á milli með sætaferðum.

Til þess að passa upp á þetta standa starfsmenn vörð fyrir utan bílastæðahúsið á milli klukkan átta og tíu á morgnana, fyrir opnun verslana, og fá starfsfólk til þess að leggja annars staðar. Yfir mesta annatímann hjálpa bílastæðaverðirnir við að stýra umferðinni á bílastæðunum.

„Við erum að reyna að hafa nóg af bílastæðum lausum,“ segir Inga Rut.

Jólaverslunin gengur ágætlega í Kringlunni og segir Inga Rut að aðsóknin nú sé aðeins meiri en á sama tíma fyrir síðustu jól.