Breytinga að vænta á fylgi Flokks fólksins

Margrét Helga Erlingsdóttir, fréttamaður, fékk til sín þau Þóru Ásgeirsdóttur, framkvæmdastjóra Maskínu, Eirík Bergmann, stjórmálafræðiprófessor við Bifröst, Huldu Þórisdóttur, prófessor í stjórnmálasálfræði við HÍ og Brynjólf Gauta Guðrúnar Jónsson, doktorsnema við Hí og fóru þau yfir helstu línur nú þegar tæp vika er til Alþingiskosninga.

Fréttastofa mun birta glænýjar fylgistölur Maskínu á fimmtudaginn næstkomandi, þær síðustu fyrir kjördag en Þóra kíkti í gögnin áður en hún mætti í stúdíó. Og hún sagði ekki miklar breytingar í kortunum. 

Tíðinda að vænta af fylgi Flokks fólksins

Þóra sagði að við blasti gjörbreytt landslag þar sem Samfylkingin og Viðreisn eru á miklu flugi.

„Í síðustu könnun var í fyrsta skipi í langan tíma sem Samfylkingin fór upp meðan Viðreisn hefur stöðugt verið á uppleið,“ sagði Þóra en Margrét Helga, umsjónarmaður Pallborðsins, setti upp mynd af því hvernig síðasta könnun Maskínu kom út.

„Já, ég kíkti áður en ég kom og það er ekki mikið að gerast miðað við þetta. Ég er hissa að sjá þetta en nokkrir flokkar virðast vera botnfrosnir og lítið að gerast þar. Ef það er eitthvað að gerast þá er það í kringum Flokk fólksins sem síðast stóð í tæpum níu prósentum.“

Meira vildi Þóra ekki upplýsa á þessu stigi máls. Ekki hvort Flokkur fólksins sé að rjúka upp í næstu könnun eða súnka. Inga Sæland, formaður flokksins sagði í Samtalinu að hún ætli með flokkinn upp í 15 prósent þannig að hugsanlega verður henni að ósk sinni.

„Mér finnst þetta nógu miklar fréttir,“ sagði Þóra og beit í tunguna á sér þegar Margrét Helga reyndi að veiða meira uppúr henni. „Þetta er bara seigfljótandi, ekkert dramatískt að gerast annað.“

Hneykslismálin ná ekki að rugga neinum bátum

Þóra vakti athygli á því að það sem merkilegt er í þessu er að fylgi stjórnarflokkanna tveir, Vinstri grænna og svo Framsóknarflokksins, virðast botnfrosnir og eru að dansa í kringum fimm prósenta línuna.

Þóra var þá spurð um hneykslismál sem upp hafa komið, en hún sagði að þau virtust ekki hafa haft mikið að segja þegar litið er til fylgismælinga.

„Við sáum það ekki í gögnunum með Þórð Snæ Júlíusson, að það færi niður, þó mikið væri um það talað. Við sáum svo sem ekkert dropp hjá Sjálfstæðisflokknum þegar þetta Jóns Gunnarssonar-mál kom upp. Og ég var heldur ekki að sjá neitt dramatískt dropp hjá Miðflokknum eftir þetta VMA mál.“

Umturnun á íslensku flokkakerfi að raungerast

Eiríkur Bergmann sagði það ljóst að við værum að gera alltof mikið úr slíkum málum. Hann sagði umturnun á flokkakerfinu á Ísland vera að sýna sig í þessum tölum.

„Vinstri græn er hluti af fjórflokknum en mælist nú stöðugt út af þingi. Þau gætu hugsanlega náð einhverjum kjördæmakjörnum en eru ekki að fara að ná yfir þennan fimm prósenta þröskuld. Þetta eru stórfréttir. Framsókn er í bullandi fallhættu líka og formaðurinn mjög ólíklega inni á þingi, það þarf kraftaverk til að ná honum inn.“

Þá benti Eiríkur á að Sjálfstæðisflokkurinn, sem borið hefur ægishjálm yfir íslensk stjórnmál, væri nú stöðugt að mælast sem þriðji stærsti flokkur landsins. Þetta væru heldur betur tíðindi.

Pallborð Vísis var einstaklega fróðlegt að þessu sinni og er það aðgengilegt í heild sinni hér neðar.