Stjúp­sonur norska krón­prinsins aftur hand­tekinn

Norskir fjölmiðlar greina frá þessu í morgun og vísa í fréttatilkynningu frá lögreglunni. Hann var handtekinn þegar hann var á ferð í bíl sínum í Osló á tólfta tímanum í gærkvöldi.

Þetta er í þriðja sinn sem Borg Høiby er handtekinn á skömmum tíma, en lögregla hefur nú víkkað út rannsóknina og er hann nú einnig grunaður um nauðgun.

Borg Høiby var fyrst handtekinn í ágúst vegna gruns um að hafa beitt konu ofbeldi í íbúð þann 4. ágúst síðastliðinn. Konan sem hann er grunaður um að hafa beitt ofbeldi var með honum í bílnum þegar hann var handtekinn í gær.

Lögregla greinir einnig frá því að húsleit hafi verið gerð í tengslum við málið og að maðurinn gisti nú fangageymslu á lögreglustöð í hverfinu Grønland í miðborg Oslóar.

Dagbladet greinir frá því að Borg Høiby sé grunaður um að hafa nauðgað konu þegar hún var meðvitundarlaus eða gat ekki af öðrum ástæðum veitt mótstöðu.

Hinn 27 ára Marius Borg Høiby er sonur Mette-Marit, eiginkonu Hákonar krónprins, úr fyrra sambandi.