Rússar hafa lagt mikið púður í að sækja í átt að Pokrovsk á undanförnum mánuðum og hafa helstu árásir rússneska hersins verið í átt að honum. Árásirnar eru bæði gerðar með stórskotaliði og með öflugum svifsprengjum. Þær geta verið tonn á þyngd og geta grandað heilu fjölbýlishúsunum í einu lagi.
Í gær var níu slíkum sprengjum varpað á bæinn, samkvæmt frétt Reuters. Fréttaveitan hefur eftir embættismanni þar að íbúar hafi ekki lengur aðgang að rafmagni, vatni og gasi og á það sama við tíu nærliggjandi þorp. Hann sagði einnig að skaðinn væri svo mikill að líklega væri ómögulegt að gera við hann.
Um þrettán þúsund manns búa í bænum en unnið hefur verið að því að flytja íbúa á brott á undanförnum vikum. Fyrir einum og hálfum mánuði bjuggu nærri því fimmtíu þúsund manns í Pokrovsk.
Úkraínumenn hafa verið á hægu en nokkuð stöðugu undanhaldi í austurhluta Úkraínu um langt skeið. Bærinn Vuhledar, sem er suður af Pokrovsk féll nýverið í hendur Rússa en honum höfðu Úkraínumenn haldið gegn þungum árásum Rússa í rúm tvö ár.
Á þeim tíma hafa verjendur Vuhledar valdið gífurlegu mannfalli hjá Rússum.
Áðurnefndar svifsprengjur Rússa hafa reynst Úkraínumönnum erfiðar.
Svifsprengjur eru oftar en ekki gamlar og stórar hefðbundnar sprengjur sem Rússar setja vængi á og staðsetningarbúnað. Sprengjunum er svo varpað úr herþotum úr mikilli hæð og geta þær svifið allt að hundrað kílómetra eða lengra áður en þær lenda á skotmarki sínu, oft með mikilli nákvæmni.
Áhugasamir geta séð stöðuna við Pokrovsk og annarsstaðar í Úkraínu á korti DeepState.
Þannig hafa Rússar getað fellt heilu fjölbýlishúsin í einni árás, sem hefði getað tekið marga taka eða vikur með hefðbundnu stórskotaliði.
Vladimír Pútín, forseti Rússlands, hefur lýst því yfir að helsta markmið Rússa sé að ná tökum á Donbas-svæðinu svokallaða, sem myndað er af Dónetsk og Lúhans-héruðum. Nú þegar stjórna Rússar um áttatíu prósentum af svæðinu.
Úkraínskur dróni fangaði nýverið meðfylgjandi myndband sem sagt er sýna rússneska hermenn taka sextán úkraínska hermenn sem gáfust upp nærri Pokrovsk af lífi.
Execution of Ukrainian prisoners of war by Russians. Pokrovsky Front, 30 of September 2024. https://t.co/9gTxvCzRjN pic.twitter.com/Fb2X8ikjtg
— Special Kherson Cat 🐈🇺🇦 (@bayraktar_1love) October 1, 2024
Færri og ekki með næg vopn
Vuhledar og Pokrovsk eru ekki einu bæirnir á svæðinu sem Rússar sækja að en það á einnig við Chasiv Yar og Toretsk. Úkraínskir hermenn á svæðinu eru færri en þeir rússnesku og Rússar hafa þar að auki yfirburði þegar kemur að stórskotaliði, drónum og svifsprengjunum skæðu, eins og fram kemur í frétt Wall Street Journal.
Þá hefur dregið töluvert úr hergagnasendingum frá Vesturlöndum og ráðamönnum í Úkraínu hefur gengið illa að fá aukningu og að fá leyfi til að nota vestræn vopn til árása í Rússlandi. Slíkar árásir, gætu samkvæmt Úkraínumönnum létt þrýstinginn á víglínunni í austri.
Það segjast þeir geta gert með árásum á vopnageymslur þar sem svifsprengjur eru geymdar og flugvelli, þar sem orrustuþoturnar sem bera þessar sprengjur taka á loft, svo eitthvað sé nefnt.
AP fréttaveitan segir Rússa varpa nærri því 120 svifsprengjum á degi hverjum.