Ísak Einar til Sam­taka at­vinnu­lífsins

Þetta kemur fram í tilkynningu frá samtökunum. Þar kemur fram að Ísak sé með BA gráðu í hagfræði frá Háskóla Íslands, MBA gráðu frá Dartmouth háskóla og MPA gráðu frá Harvard háskóla.

Hann komi til samtakanna frá alþjóðlega ráðgjafarfyrirtækinu Boston Consulting Group. Hann hafi áður starfað hjá Alþjóðamálastofnuninni í Róm, á hagfræðisviði Viðskiptaráðs og sem blaðamaður á Viðskiptablaðinu. Þá hafi hann verið forseti Stúdentaráðs Háskóla Íslands á háskólaárum sínum.

„Það er frábært að fá tækifæri til að starfa í þágu íslensks atvinnulífs og samfélags alls, í samvinnu við allt það góða fólk sem starfar hjá samtökunum. Ísland hefur verið í örum vexti undanfarin ár, hvort sem litið er til fólksfjölda eða efnahags. Samtök atvinnulífsins hafa mikinn slagkraft og við þurfum að beita okkur fyrir því að hagsæld aukist enn og tækifærum haldi áfram að fjölga,“ er haft eftir Ísak.

„Við hjá Samtökum atvinnulífsins njótum krafta öflugs starfsfólks í hverju hlutverki. Við munum leggja áherslu á efnahagslegan stöðugleika, samkeppnishæfan útflutningsgeira, mannauðinn, tæknina, græna orku og grænar lausnir á komandi misserum. Við bjóðum Ísak velkominn og vitum að hann mun ekki láta sitt eftir liggja á þeirri vegferð,“ er haft eftir Sigríði Margréti Oddsdóttur, framkvæmdastjóra Samtaka atvinnulífsins.