Er­lend glæpa­gengi fá Ís­lendinga til að ræna reiðhjólaverslanir

Greint var frá því á Vísi í ágúst að fjölmörg innbrot í hjólabúðir hafi verið gerð vikurnar og mánuðina á undan. Hafði þá til að mynda verið brotist inn í verslunina Púkann, Peltaon, í tvígang í Örninn og TRI.

Og ekkert lát virðist á innbrotafaraldrinum. Á aðfaranótt fimmtudags var brotist inn í TRI aftur. Áður hafa þjófarnir brotist inn um rúðu framan á búðinni en að þessu sinni var farið í gegn um litla lúgu, sem er aftan á húsinu. Það hefur verið vandaverk þar sem stór gámur er um þrjátíu sentímetra frá útveggnum og þjófarnir því þurft að troða sér þar á milli.

En það tókst þeim. Tveir menn fóru inn í verslunina og létu greipar sópa. Annar tók reiðhjól og bakpoka, sem hann endaði þó á að skilja eftir. Hinn tók rafhjól með kassa framan á og hlóð þremur hjólum til viðbótar í kassann. Á leiðinni út datt eitt hjólið af og hin tvö skemmdust í hamaganginum.

„Þau fóru fjögur héðan. Fundust tvö strax eiginlega og tvö eru ófundin,“ segir Róbert Grétar Pétursson, framkvæmdastjóri TRI. En hvað er gert við þýfið?

„Það er annað hvort bara selt sem notað hjól  og einhverjir sem kaupa þetta og halda að þeir séu að gera rosa góðan díl. Svo held ég líka að það sé verið að taka í sundur og selja bara parta.“

Mikil umferð í kring um búðina um miðjar nætur

Brotist hefur verið í tvígang inn í Kríuna, sem er á Grandagarði. Verslunarstjóri segist verða var við mikla umferð í kring um búðina um miðjar nætur.

„Það er áhugavert hversu oft við erum að fá heimsókn fyrir utan opnunartíma. Sérstaklega ekki á tíma þar sem er dagsbirta heldur um miðja nótt. Myndavélin tekur upp og vð fáum tilkynningu í símann,“ segir Steven Gromatka, verslunarstjóri Kríunnar. 

Hann segist verða var almennt við fleiri innbrot, ekki bara í reiðhjólaverslunum. 

„Mér finnst innbrotum á Íslandi vera að fjölga, ekki bara í hjólunum. Ég sé á Facebook á hverjum degi að brotist er inn í búðir og líka heima hjá fólki,“ segir Steven. 

„Það er eitthvað í gangi núna sem ég bjóst ekki við þegar ég flutti til Íslands. Tilfinningin, hér í Reykjavík sérstaklega, er óþægileg.“

Reyndu að flytja þýfið út með Norrænu

Lögreglufulltrúi, sem hefur sérhæft sig í málum sem þessum, segir innbrot í reiðhjólaverslanir nokkuð ný af nálinni. Áður hafi slíkur þjófnaður aðallega farið fram á víðavangi eða í fjölbýlishúsum. Eitthvað af þýfinu er selt á svörtum markaði en ekki allt.

„Við höfum komist yfir sendingar sem ætlað er að fari erlendis með ferjunni á Seyðisfirði. Eitthvað er örugglega selt á svörtum markaði, jafnvel búið að breyta hjólunum eitthvað,“ segir Guðmundur Pétur Guðmundsson, lögreglufulltrúi. 

Erlendur glæpahópur stóð að þeim útflutningi.

„Við vitum að erlend glæpasamtök hafa fengið íslenska aðila til að brjótast inn í verslanir og stela fyrir sig.“

Heldurðu að tilkoma rafhjóla hafi eitthvað með það að gera að þjófar sækist meira í verslanirnar? 

„Já, þetta eru dýrari gripir, sannarlega. Mjög vinsælir og eftirsóttir og auðvelt að selja,“ segir Guðmundur Pétur.

En hvað geta verslanirnar gert til að stemma stigu við þessa þróun?

„Vera með alvöru varnir, þar sem þú dregur niður grind og læsir þannig að framhlið búðarinnar er alveg lokuð og allt sem er bakatil er með rimlum líka. Bara aðeins að taka þetta í gegn og hugsa upp á nýtt.“