Þessi stórskrítnu norm í óbarnvænu sam­fé­lagi

Það er of margt uggvænlegt að gerast. Fólki líður ekki nógu vel og börnunum okkar líður ekki nógu vel. Þessa dagana er alltof mikið af hræðilegum atburðum að eiga sér stað á Íslandi.

Það er slatti af „normum“ hér á landi sem eru ekki góð norm.

Normið að börn fari ung frá foreldrum sínum og dagar þeirra séu langir.

Normið að börn séu þreytt og tætt og með upptendruð taugakerfi.

Normið að íslenskt skólakerfi sé komið að þolmörkum vegna álags.

Normið að kennarar og skólastarfsmenn þurfi stöðugt að vera að slökkva elda vegna vanlíðunar barna.

Normið að kennarar og skólastarfsmenn séu að kafna úr álagi vegna allra þeirra barna sem líður ekki vel.

Normið að drengirnir okkar dafni illa innan skólakerfisins.

Normið að það sé "alltaf" mikið að gera hjá fjölskyldum og að samfélagið krefjist of mikils af þeim.

Normið að börn eyði miklum tíma fyrir framan skjá.

Normið að íslensk börn skori hátt þegar kemur að lyfjanotkun tengdri andlegri líðan.

Normið að foreldrar séu örþreyttir og að kafna undan álagi.

Normið að unglingar okkar drekka alltof mikið af orkudrykkjum og skorti svefn.

Normið að það sé dýrt og erfitt að fá nauðsynlega geðheilbrigðisþjónustu fyrir börn og ungmenni á Íslandi.

Normið að íslenskt samfélag sé ekki fjölskyldvænt.

Mér finnst í lengri tíma hafa ríkt nokkurs konar meðvirkni þegar kemur að mörgum hlutum í samfélaginu okkar. Að við eigum bara að segja að allt "gangi vel" og "sé í lagi." Það er ekki raunin og það þarf að horfast í augu við vandann.

Það er fullt af fólki að gera vel og reyna sitt allra besta og það er fullt af stórkostlegu fólki inn í kerfunum okkar að reyna eins og það getur en þetta er samt svo þungt.

Og staðreyndin er sú að of mörgum íslenskum börnum líður illa.

Það þarf að brjóta norm og breyta þeim og byggja upp fjölskylduvænna samfélag með börn í forgrunni. Kerfið sem grípur foreldra og börn þarf að vera sterkara. Það þarf að finna leiðir svo foreldrar og börn geti ræktað tengsl sín enn betur. Mögulega má segja að nokkurs konar tengslarof ríki í samfélaginu og fátt hefur meira forvarnargildi en sterk tengsl foreldra og barna.

Börn eru grunnur hvers samfélags og það ætti allt að vera hugsað út frá þeim. Í dag er stundum eins og börn séu nokkurs konar aukahlutur. Það þarf að auka fjármagn þegar kemur að málefnum barna. Það þarf að vanda grunninn vel svo húsið standi. Við viljum ekki þjóðfélag byggt á sandi!