Þingfundur var óvenju stuttur í dag eða rétt rúmir tveir tímar. Fyrir utan umræður um störf þingsins voru einungis frumvörp frá stjórnarandstöðunni á dagskrá og ein þingsályktunartillaga frá þingmönnum Vinstri grænna í meðflutningi þingmanna Pírata og Samfylkingar.
Í umræðum um störf þingsins var vakin athygli á ríkisstjórnin hefði aðeins lagt fram tvö mál á þinginu fyrir utan fjárlagafrumvarpið. En rúmlega tvö hundruð mál eru á málaskrá ríkisstjórnarinnar.
Sigmar Guðmundsson þingmaður Viðreisnar var einn þeirra sem vakti athygli á þessari stöðu en hann ræddi líka nýjustu vendingar í máli hælisleitandans Yazan Tamimi og fjölskyldu hans, sem stóð til að flytja úr landi aðfararnótt mánudags.
„Í stað þess að vera tilbúin í þingvetur með raunverulegum aðgerðum fyrir fólk og fyrirtæki ber mest á ósættinu sem er auðvitað ekki nýtt. En það er óvenju nöturlegt að þessu sinni. Algerlega óháð því hvaða skoðun menn og flokkar hafa á hælileitendamálum hljótum við öll að fordæma að langveikt barn í hjólastól sé peð og fórnarlamb átaka við ríkisstjórnarborðið,“ sagði Sigmar. Atburðarásin undanfarið væri engum til sóma og ógn við Heilsu Yazan Tamimi.
Jóhann Páll Jóhannsson þingmaður Samfylkingarinnar tók málið einnig upp í umræðum um störf þingsins.
„Yazan á að fá efnismeðferð segir einn ráðherrann. Ákvörðun um brottvísun stendur segir annar. Litlar líkur til þess að þessi drengur verði fluttur burt, segir sá þriðji,“ sagði Jóhann Páll. Á meðan biði langveikur strákur milli vonar og ótta á sjúkrahúsi.
„Það er komið nóg af þessu. Drengurinn og fjölskylda hans, sem hafa orðið núna leiksoppur í einhverju pólitísku leikriti,verða að fá fullvissu um það, heilsu drengsins vegna, fullvissu um það frá stjórnvöldum að hann sé óhultur á sjúkrahúsi. Að hann fái að njóta öryggis á sjúkrastofnun eins og gildir almennt um sjúklinga,“ sagði Jóhann Páll Jóhannsson.
Engin stjórnarmál til umræðu
Fjögur frumvörp frá stjórnarandstöðunni, þar af tvö frá Ingu Sæland og þingmönnum Flokks fólksins, voru rædd og afgreidd til nefnda og annarrar umræðu í dag. Inga sagði mál stjórnarandstöðunnar notuð sem uppfyllingarefni þegar engin mál lægju fyrir frá ríkisstjórninni.
Hún endurflutti annars vegar frumvarp um að húsnæðisliðurinn verði tekinn úr útreikningi neysluverðs og hins vegar frumvarp um afnám verðtryggingar á lánum til neytenda.
„Við í Flokki fólksins höfum ætíð barist fyrir því að reyna að tryggja afkomu heimila og lítilla og meðalstórra fyrirtækja í landinu. Nú erum við að óska eftir því að húsnæðisliðurinn verði tekinn út úr vísitölu, sem er margviðurkennt að myndi koma hér verðbólgunni í 3,6 prósent,“ sagði Inga í beinni útsendingu í kvöldfréttum Stöðvar 2 í kvöld.
Hún sagði að afnám verðtryggingar í neytendalánum yrði gríðarleg kjarabót.
„Jafnvel þrátt fyrir að við séum uppfyllingarefni og séum búin að leggja fram 71 þingmál í Flokki fólksins, þá er ég að vonast til þess að minnsta kosti að þetta með húsnæðisliðinn verði tekið í fangið og fái að ganga lýðræðislegt ferli í gegnum Alþingi, til tilbreytingar. Það er nú það sem allir ráðherrar, meira og minna, eru að grobba sig af, að nú væri 3,6 prósent verðbólga ef húsnæðisliðurinn væri ekki í vísitölunni. Þannig að, gjörið svo vel,“ sagði Inga.
Hún sagði það hafa verið reynslu Flokks fólksins að stjórnarandstaðan væri ákveðið uppfyllingarefni á þingi.
„Það er um það bil helmingur þingmanna sem ekki sitja í ráðherrastólum, sem eru að vinna hér baki brotnu allan veturinn. Þeirra mál, við mælum fyrir flestum þeirra, festast síðan í nefnd og verður aldrei neitt meira af þeim,“ sagði Inga.
Viðskiptaþvinganir á Ísrael „verðskuldað næsta skref“
Stjórnarþingmaðurinn Steinunn Þóra Árnadóttir mælti fyrir þingsályktun ásamt þremur öðrum þingmönnum Vinstri grænna og þingmönnum úr Viðreisn, Samfylkingu og Pírötum um viðskiptaþvinganir gagnvart Ísrael.
„Alþingi ályktar að fela ríkisstjórn Íslands að beita sér fyrir því að alþjóðlegum viðskiptaþvingunum verði komið á gagnvart Ísrael vegna framgöngu Ísraelshers í Palestínu,” segir orðrétt í þingsályktunartillögunni. Steinunn er ekki óvön því að sem stjórnarþingmaður að tillögur hennar varðandi úrsögn Íslands úr NATO nái ekki fram að ganga.
Hún segist ekki viss um að það séu sérstök tíðindi að hún sé einn flutningsmanna tillögunnar.
„Ég hef beitt mér fyrir málefnum sem snúa að Palestínu hingað til. Mér fannst tímabært að leggja fram svona þingsályktunartillögu,“ sagði Steinunn Þóra.
Þér finnst þá væntanlega í leiðinni að ríkisstjórnin hafi ekki gengið nógu langt í þessum efnum?
„Ég held að það sé hægt að gera betur hér. Það hefur ýmislegt gott verið gert. Alþingi samþykkti þingsályktunartillögu einróma, það fannst mér skipta gríðarlega miklu máli. Við höfum verið að styðja Palestínu og flóttamannastarfið þar, þannig að mér finnst þetta vera verðskuldað næsta skref að Ísland taki.“
Hún segist telja að skref sem þetta myndi hafa áhrif á framgöngu Ísraels í Palestínu ef fleiri þjóðir tækju sig saman um slíkar aðgerðir.
„Viðskipti Íslands við Ísrael eru lítil, en með því að fá fleiri þjóðir í lið með okkur myndi það hafa alvöru vægi.“
