Bjørn Richard til liðs við At­hygli

Í fréttatilkynningu þess efnis segir að Bjørn Richard sé einn þekktasti og virtasti ráðgjafi Norðurlanda í samskiptaráðgjöf og krísustjórnun og búi yfir áratuga reynslu í faginu. 

Bjørn Richard sé vel kunnugur íslensku atvinnulífi. Hann hafi sem dæmi verið ráðinn af forsætisráðuneytinu við krísustjórnun og komið til ráðgjafar við ríkisstjórn Íslands í kjölfar efnahagshrunsins 2008. Þá hafi hann starfað sem framkvæmdastjóri samskipta hjá Glitni banka árin 2004 til 2008.

Árið 2009 hafi hann stofnað ráðgjafarfyrirtækið First House í Oslo. Í dag sé hann viðskiptastjóri Geelmuyden Kiese og ráðgjafi stjórnar Paritee, móðurfélags Geelmuyden Kiese. Geelmuyden Kiese sé eitt stærsta og elsta samskiptafyrirtæki Norðurlanda og Athygli muni samtímis verða samstarfsaðili Geelmuydeen Kiese á Íslandi.

Elskar Ísland

„Mér hefur verið sýnt það traust að koma að úrlausn mála við margar af stærstu áskorunum sem Ísland hefur mætt á undanförnum áratugum auk annarra mikilvægra verkefna. Undanfarið hefur hugmyndin um meiri viðveru á Íslandi ágerst samhliða því að ég hef fundið fyrir aukinni þörf fyrir sérhæfða samskiptaráðgjöf. Ég hef unnið náið með Athygli í gegnum árin, þekki vel getu þeirra og styrkleika, og hlakka mikið til að vinna enn frekar með því öfluga teymi sem þau hafa yfir að skipa samhliða störfum mínum í Noregi,“ er haft eftir Bjørn Richard.

Hann elski Ísland, fólkið og takmarkalausan styrk þess, náttúru og samfélag. Hann hafi ferðast um landið allt á mótorhjóli og í tengslum við ólík verkefni. Það sé honum því sönn ánægja að hafa hér fastan samastað til að sinna spennandi verkefnum fyrir íslenskt atvinnlíf.

Ráðagóður með eindæmum

„Við erum stolt af því að fá Bjørn Richard til liðs við okkur og að geta boðið íslenskum aðilum upp á einstaka sérþekkingu hans. Hann er ráðagóður með eindæmum, fróður og öflugur leiðtogi með áralanga reynslu af að stýra erfiðum og flóknum málum úr ólgusjó í örugga höfn. Við sjáum líka spennandi tækifæri í enn frekari samvinnu við Geelmuyden Kiese og sérstaklega sterkri stöðu þeirra á Norðurlöndunum auk tenginga þeirra við London, New York, Minneapolis og San Fransisco,“ er haft eftir Kolbeini Marteinssyni, framkvæmdastjóra Athygli.