Hundruð mót­mæla brott­vísun Yazan

„Yazan á heima hér. Öll börn eru okkar börn. Yazan er okkar barn,“ hrópa mótmælendur fyrir utan fund ríkisstjórnarinnar.

Einhverjir ráðherranna mættu mótmælendum þegar þau löbbuðu inn snemma í morgun. Þegar Guðrún Hafsteinsdóttir gekk inn hrópuðu mótmælendur að henni að Yazan ætti heima hér. Mótmælin eru friðsamleg og eru mótmælendur aðallega að syngja. Þau hafa sungið Smávinir fagrir eftir Jónas Hallgrímsson og Vikivaki eftir Jóhannes úr Kötlum. 

Þá hélt Einar Már Guðmundsson rithöfundur ræðu á fundinum en svo er opið fyrir hvern sem er að halda ræðu. 

Sólveig Arnarsdóttir leikkona er ein þeirra sem mótmælir við Hverfisgötuna. Hún segir íslenskum stjórnvöldum ekki skylt að senda Yazan til Spánar. Dyflinnarreglugerðin sé viðmið en ekki lög. Hún segir Yazan andlega og líkamlega kominn að þolmörkum sínum en eins og fram hefur komið er Yazan með Duchenne-heilkennið.

„Hann á heima hér og hér á hann að vera,“ segir Sólveig í samtali við fréttamann okkar á staðnum.

Vilja að mannréttindum sé framfylgt

„Það eru vel yfir hundrað manns hérna,“ segir Pétur Eggerz Pétursson, einn skipuleggjenda mótmælanna, og að krafa þeirra sé að brottvísun fari ekki fram.

„Og að mannréttindum sé fylgt hér.“ Hann segir að mótmælendur stefni á að vera á staðnum þar til ríkisstjórnin er búin að funda í það minnsta. Misjafnt er hversu lengi ríkisstjórnin fundar en iðulega er það til jafnvel hádegis. 

Búið er að girða svæðið vel af og er nokkuð fjölmennt af lögreglu einnig á staðnum. Boðað var til mótmælanna í gær og segir í fundarboðinu á Facebook að mótmælendur vilji sýna ríkisstjórninni að þau hafi ekki gleymt mennskunni.

„Viljum sýna í verki að ofbeldi gegn börnum sé aldrei boðlegt. Yazan á heima hér,“ segir í fundarboðinu en um þúsund hafa svarað boðinu. 

Hafði ekki heimild til að stíga inn

Mál Yazans hefur vakið mikla athygli undanfarnar vikur og samstöðufundir haldnir til stuðnings honum. Eftir að brottvísun hans til Spánar var frestað í gær eftir að hann var sóttur í Rjóðrið á Landspítalanum ítrekaði dómsmálaráðherra að enn stæði til að vísa honum úr landi. 

Yazan var í gær vakinn af lögreglu og fluttur frá Landspítalanum á Keflavíkurflugvöll, þaðan sem fljúga átti honum til Spánar ásamt fjölskyldu. Yazan og fjölskylda hans voru komin upp á völl þegar fyrirskipun um að stöðva ætti brottflutning hans barst. 

Í viðtali við RÚV í gær sagðist hún ekki hafa haft lagalega heimild til að stíga inn í mál Yazans Tamimi en hún fyrirskipaði að brottvísuninni yrði frestað, í gær, að beiðni Guðmundar Inga Guðbrandssonar félagsmálaráðherra. 

Fréttin er í vinnslu.