Hjólakeppnin Grefillinn nýtur sí­fellt meiri vin­sælda

Keppnin fór fram í Borgarfirði og Kaldadal en rásmark og endamark var í Logalandi sem er rétt um 103 km frá höfuðborgarsvæðinu. Þrjár vegalengdir voru í boði, 45, 100 og 200 km þar sem hjólað var um fjölbreytta náttúru, afskekkt hálendi, sveitavegi og yfir skemmtilegar ár.

„Það hefur verið mikill vöxtur erlendis og hérlendis í þessum flokki þar sem keppendur eru að hjóla á malarvegum en ekki á malbiki eða fjallastígum,“ segir Andri Már Helgason, annar mótsstjóra keppninnar og meðlimur í mótanefnd hjólreiðadeildar Breiðabliks. „Við héldum fyrstu keppnina árið 2021 en þá höfðum við fundið fyrir miklum áhuga hjólreiðamanna í einhvern tíma. Þessi fyrsta keppni var hálfgerð tilraun en hún heppnaðist mjög vel og í kjölfarið hófum við samstarf með hjólaversluninni TRI, hjólafatamerkinu Castelli sem fæst í TRI og náttúrulauginni Krauma.“

Ári síðar mættu enn fleiri keppendur til leiks en þá var þriðju leiðinni bætt við sem var 45 km og var helst stíluð inn á þá sem eru að stíga sín fyrstu skref í malarhjólreiðum. Vinsældir keppninnar hafa síðan aukist jafnt og þétt og síðasta laugardag var metþátttaka þegar 180 skráðu sig til leiks.

Hugsað sem skemmtilegur viðburður

„Gravel hjólakeppnir byggja svolítið á annarri hugsun en götuhjóla- og fjallahjólakeppnir þar sem tímataka skiptir miklu máli og strangt regluverk er í gildi. Gravel keppnir eru sprottnar fram úr grasrótinni og þar er meira lagt upp úr því að hafa gaman enda skiptir tímatakan ekki öllu máli. Undanfarin tvö ári höfum við líka fundið fyrir því að áhuginn á keppnishjólreiðum innan sérsambanda hefur dvínað meðan gravel keppnir njóta sífellt meiri vinsælda.“

Hann segir skipuleggjendur leggja mikla áherslu á að þetta snúist ekki bara um keppni heldur sé keppnin líka hugsuð sem skemmtilegur viðburður. „Síðustu ár höfum við leigt félagsheimilið í Logalandi sem býður upp á tjaldsvæði og við hvetjum keppendur og aðra gesti til að eyða helginni þar með okkur og njóta lífsins. Krauma býður líka öllum keppendum ókeypis ofan í enda er mjög vinsælt að kíkja þangað eftir keppni.“

Helstu úrslit urðu þau að í 200 km Pro/Elite karlaflokki sigraði Ingvar Ómarsson (Breiðablik) en Þorsteinn Bárðarson (Tindur) var í öðru sæti.

Í 200 km Pro/Elite kvennaflokki kom Ágústa Edda Björnsdóttir (Tindur) fyrst en Kristín Edda Sveinsdóttir (HFR) var í öðru sæti.

Önnur helstu úrslit voru þau að í 200 km Masters 18-44 ára sigruðu Natalía Reynisdóttir (Breiðablik) og Gauti Reynisson (Tindur), í 200 km Masters 45+ sigruðu Valborg Hlín Guðlaugsdóttir (Breiðablik) og Páll Snorrason (Tindur).

Í 100 km vegalengdinni sigraði Tryggvi Kristjánsson (Team Kudos) en í kvennaflokki sigraði Björg Hákonardóttir (Breiðablik). Loks voru sigurvegarar í 45 km vegalengdinni þau Sigurbergur Kárason (Snarpur) og Edda Vésteinsdóttir.

Önnur helstu úrslit er að finna hér.

Veðrið lék við keppendur stærstan hluta dags og bærði varla hár á höfði allan keppnisdaginn.

Réttur klæðnaður skiptir öllu máli

Í Gravel hjólakeppnum skiptir mjög miklu máli að keppendur séu rétt klæddir enda hjóla þeir iðulega við mjög fjölbreyttar og krefjandi aðstæður. 

„Keppendur byrja kannski snemma morguns á láglendi í svölu veðri en svo hlýnar smátt og smátt. Seinna í keppninni eru þeir síðan jafnvel komnir upp á hálendið í rok og rigningu. 

Við slíkar aðstæður er ljóst að réttur fatnaður skiptir gríðarlega miklu máli og hefur hjólafatamerkið Castelli komið mjög sterkt inn en TRI er einmitt umboðsaðili þess hér á landi og býður upp á fjölbreytt úrval í verslun sinni við Suðurlandsbraut í Reykjavík.“