„Skrýtinn“ högg­staður á Trump sem snýr sér að kyn­þætti Har­ris

Allt virtist stefna í nokkuð öruggan sigur Trump í forsetakosningunum í nóvember, jafnvel áður en Biden þótti standa sig herfilega í sjónvarpskappræðum þeirra tveggja fyrr í sumar. 

Eftir að Biden ákvað að stíga til hliðar sem forsetaefni demókrata og Harris varð væntanlegur frambjóðandi flokksins hefur stemningin í kringum flokkana tvo breyst umtalsvert. Nú eru repúblikanar komnir í vörn á meðan demókratar hafa prófað sig áfram með nýjar leiðir til að koma höggi á mótherja sína í augum kjósenda.

Skilaði litlu að rísa hátt

Þegar Trump lét fúkyrði fjúka um leiðtoga demókrata í gegnum tíðina var viðkvæði þeirra lengi að sökkva ekki niður á sama plan. 

Í kosningabaráttunni árið 2016 minntist Trump varla á Hillary Clinton, mótframbjóðanda sinn, án þess að uppnefna hana „Spilltu Hillary“. Clinton svaraði með því að segja að „þegar þeir leggjast lágt, rísum við hátt“. Það gagnaðist Clinton lítið sem tapaði kosningunum óvænt.

Trump hefur haldið uppteknum hætti síðan og kallað Joe Biden forseta „Syfjaða Jóa“ og fjölskyldu hans glæpamenn. Kamölu Harris varaforseta hefur hann kallað loddara og illkvitnislega. 

Demókratar reyndu á móti að mála Trump sem ógn við lýðræðið en það virtist ekki hreyfa mikið við kjósendum sem flakka á milli flokkanna tveggja og ráða alla jafna úrslitum kosninga vestanhafs. 

Þeir hafa nú hins vegar fundið óvæntan höggstað á Trump og varaforsetaefni hans með því svara á vissan hátt í sömu mynt og kalla þá „skrýtna“.

„Gamall og frekar skrýtinn?“

Með Harris í brúnni hefur kosningabarátta demókrata fengið á sig annan blæ og eru kjósendur flokksins nú mun áhugasamari en áður um að styðja sinn frambjóðanda. Á sama tíma virðist nýjasta skot þeirra á mótherjana hafa náð í gegn: að Trump og J.D. Vance, varaforsetaefni hans, séu „skrýtnir“ náungar.

Boltinn byrjaði að rúlla eftir að Tim Walz, ríkisstjóri Minnesota sem hefur verið nefndur sem mögulegt varaforsetaefni Harris, kallaði Vance „bara skrýtinn“ í sjónvarpsviðtali í síðustu viku. Hann fylgdi því eftir með því að kalla Trump skrýtinn fyrir að tala ítrekað um fjöldamorðingjann Hannibal Lecter úr kvikmyndinni „Lömbin þagna“ á kosningafundum.

Síðan þá hefur hver demókratinn á fætur öðrum lýst repúblikönum almennt sem furðufuglum í viðtölum og á samfélagsmiðlum. Stuðningsmenn þeirra hafa endurómað málflutninginn á netinu.

„Trump er gamall og frekar skrýtinn?“ var á meðal talpunkta sem framboð Harris sendi frá sér til að bregðast við viðtali Trump við Fox-sjónvarpsstöðina fyrir viku. Dagana á eftir lýsti framboðið því ítrekað yfir í fréttatilkynningum að Vance væri skrýtinn.

Gagnrýnina má ekki síst rekja til gamalla ummæla Vance um barnlaust fólk og leiðtoga Demókrataflokksins. Lýsti hann demókrötum eins og Harris sem eru ekki líffræðilegir foreldrar sem „barnlausum kattarkonum“ sem ættu ekki beinna hagsmuna að gæta í framtíð Bandaríkjanna og vildu að öllum liði illa eins og þeim sjálfum. Hann hefur einnig viðrað hugmyndir um að barnafólk ætti að fá aukið atkvæðavægi í kosningum.

Jafnvel Joe Manchin, öldungadeildarþingmaður demókrata frá Vestur-Virginíu, sem reynir um fram aðra þingmenn að fara bil beggja flokka tók þátt í að skjóta á Vance.

„Það er sannarlega skrýtin afstaða. Ég hef aldrei heyrt þetta áður. Það var mjög skrýtið. Ég trúði því ekki,“ sagði Manchin þegar hann var spurður út ummæli Vance um barnlaust fólk.

Ekki fundið mótsvar sem virkar ennþá

Repúblikanar hafa átt erfitt með að bregðast við þessari nýju nálgun andstæðinga sinna.

„Þau kalla okkur skrýtin þannig að ég kalla þau skrýtnari. Það er það sem ég gerði í framhaldsskóla,“ sagði Marco Rubio, öldungadeildarþingmaður repúblikana frá Flórída.

„Ég veit ekki hver fann upp á þessum skilaboðum, en ég hylli þau,“ segir David Karpf, prófessor í almanntengslum við George Washington-háskóla við AP-fréttastofuna.

Skilaboðin séu stutt og hnitmiðuð og fari í taugarnar á andstæðingnum sem geti leitt til þess að þeir geri illt verra með vanstilltum viðbrögðum.

„Til þessa hafa Trump og Vance ekki getað fundið svar sem virkar,“ segir Karpf.

Vance sjálfur reyndi að snúa árásum demókrata gegn þeim og  deildi myndbandi af Harris ræða um hvernig loftslagskvíði geti fengið fólk til að efast um að eignast börn í framtíðinni.

„Það er næstum eins og þetta fólk vilji ekki að ungt fólk stofni fjölskyldu eða eitthvað. Mjög skrýtið dæmi,“ tísti Vance á samfélagsmiðlinum sem áður gekk undir nafninu Twitter.

Vance hefur þrátt fyrir það átt í vök að verjast vegna ummæla sinna. Hann segir þau hafa verið sett fram í kaldhæðni. Það eina sem hann hafi átt við að fólk fái nýja sýn á lífið þegar það eignast börn. Trump neyddist til þess að verja varaforsetaefni sitt með þeim orðum að Vance kynni að meta fjölskylduna.

Jafnvel áður en kattakonuummæli hans komust í hámæli mældist Vance óvanalega óvinsælt varaforsetaefni. Kannanir sem voru gerðar eftir að Trump valdi hann til starfans sýndu að hann væri verst liðna varaforsetaefni flokkana frá 1980.

Segir Harris hafa „orðið“ svarta með tímanum

Trump og repúblikanar hafa átt erfitt með að bregðast við umbreytingunum á kosningabaráttunni með innkomu Harris. Þeir hafa reynt fyrir sér með því að kenna Harris um stríðan straum hælisleitenda á suðurlandamærunum að Mexíkó og kallað hana „landamærastjóra“ Biden.

Síðustu dagana hefur Trump ákveðið að setja kynþátt Harris á oddinn og reyna að vefengja að hún sé raunverulega svört. Móðir Harris er indversk en faðir hennar blökkumaður upphaflega frá Jamaíka.

„Ég vissi ekki að hún væri svört fyrr en fyrir nokkrum árum þegar svo vildi til að hún varð svört og nú vill hún vera þekkt sem svört. Þannig að ég veit það ekki. Er hún indversk eða er hún svört?“ sagði Trump á viðburði Samtaka svartra blaðamanna á miðvikudagsskvöld. 

„Ég virði bæði en hún gerir það augljóslega ekki því hún var indversk alla leið en svo allt í einu snérist hún og varð svartur einstaklingur,“ sagði fyrrverandi forsetinn við dræmar undirtektir viðstaddra.

Kynþáttaárásir gætu orðið aðalmálið hvort sem repúblikönum líkar betur eða verr

Ekki eru allir repúblikanar sannfærðir um hversu viturlegt það sé að ráðast á Harris fyrir uppruna hennar, þar á meðal sumir innan framboðs Trump sjálfs. Þeir vilja að Trump velgi Harris undir uggum með því að vega að stefnumálum hennar og kenna henni um verðbólgu og ástandið á landamærunum.

AP-fréttastofan segir að í ljósi þess hvernig Trump hefur talað um kynþáttamál í gegnum tíðina sé ekki ósennilegt að þessar árásir verði efst á baugi hjá frambjóðandanum, hvort sem repúblikönum líkar betur eða verr.

„Trump virðist halda að hann geti gagnrýnt hana fyrir hvernig hún hefur nálgast kynþátt sinn. Það er enginn sem hlustar á slíka gagnrýni. Það skiptir engu máli. Það kemur í bakið á honum ef þetta snýst um kynþátt,“ segir Frank Luntz, skoðanakönnuður Repúblikanaflokksins sem er gamall í hettunni.

Niðurstöður könnunar sem hann lagði fyrir rýnihóp óháðra kjósenda beint eftir viðtalið við Trump á miðvikudag benti til þess að árásir á kynþátt Harris gætu komið niður á Trump sjálfum á meðal þeirra kjósenda sem ráða að líkindum úrslitum í nóvember.

Ósennilegt er að Trump, sem haslaði sér völl í bandarískum stjórnmálum með samsæriskenningum um að Barack Obama væri ekki raunverulegur Bandaríkjamaður, hlusti á mótbárur. Hann hélt áfram að höggva í sama knérunn á samfélagsmiðli sínum Truth Social á fimmtudag þar sem hann birti gamla mynd af Harris með indverskri móðurfjölskyldu sinni og „þakkaði“ henni fyrir ást sína á indverskri arfleið sinni.