Alls voru 135 mál skráð í málagrunn lögreglunnar, LÖKE, á höfuðborgarsvæðinu í nótt.
Tilkynnt var um innbrot og þjófnað í verslun í póstnúmerinu 108 og um vinnuslys í Hafnarfirði en þar fékk maður gat á höfuðið þegar hann var að gera við nema undir vaski. Hugðist hann koma sér sjálfur á bráðamóttöku.
Ein tilkynning barst vegna einstaklings sem datt á rafmagnshlaupahjóli í miðborginni. Meiðsl voru minniháttar en grunur leikur á um að viðkomandi hafi verið ölvaður. Þá urðu minniháttar skemmdir þegar mannlaus bifreið rann inn í garð í Mosfellsbæ.
Nokkrir voru stöðvaðir fyrir of hraðan akstur og að minnsta kosti tveir fyrir akstur undir áhrifum.
