Lætur staðar numið í pólitíkinni

Sara Dögg greinir frá þessu á Facebooksíðu sinni. „Ég hef ákveðið að láta staðar numið í pólitíkinni,“ segir hún.

Hún segist þakklát fyrir það traust sem henni hefur verið sýnt af kjósendum og félögum hennar í Garðabæ. Á sama tíma sé hún þakklát fyrir þá dýrmætu reynslu sem vera hennar við bæjarstjórnarborðið hafi fært henni. „Viðreisn í Garðabæ verður áfram í öruggum höndum félaga minna.“

Einbeitir sér að vinnunni

Sara Dögg segir að henni hafi verið falið óendanlega spennandi verkefni í vinnulífi sínu sem sé þess eðlis að hún kjósi að einbeita sér alfarið að því. Hún tók nýverið við starfi hjá Vinnumálastofnun.

„Að fá að taka þátt í því að leiða breytingar með það að markmiði að auka tækifæri fatlaðs fólks í samfélaginu til þátttöku m.a á vinnumarkaði er ómetanlegt. Þar er verk að vinna og ég vil nýta ástríðuna mína af öllu hjarta í þau verkefni á meðan ég fæ tækifæri til.“