Ey­dís og Þor­valdur til Genís

Í tilkynningu segir að Eydís hafi verið ráðin í nýja stöðu framkvæmdastjóra gæða- og tæknimála og þá mun Þorvaldur veita félaginu ráðgjöf á sviði beinígræðslu og lækningatækja.

„Eydís hefur undanfarin sjö ár starfað hjá Alvotech, nú síðast sem yfirmaður og sérfræðingur á sviði gæðamála, og þar áður m.a. hjá spænska lyfjafyrirtækinu PharmaMar í Madrid og hjá ArcticMass á Íslandi. Eydís er með Ph.D. og M.Sc. í lyfjavísindum frá Háskóla Íslands og hefur víðtæka reynslu af lyfjaþróun og gæðamálum. Hún hefur þegar tekið til starfa.

Þá hefur Þorvaldur Ingvarsson einnig gengið til liðs við Genís hf. og mun veita félaginu ráðgjöf á sviði beinígræðslu og lækningatækja. Þorvaldur útskrifaðist úr læknadeild Háskóla Íslands árið 1987 og hlaut doktorsgráðu í bæklunarskurðlækningum frá Háskólanum í Lundi árið 2000. Hann starfar sem bæklunarlæknir í Orkuhúsinu, sem og við Landspítala og á Sjúkrahúsinu á Akureyri. Þorvaldur situr í stjórn Medor, í háskólaráði Háskóla Íslands og er prófessor við Heilbrigðisvísindastofnun HA. Áður starfaði hann sem framkvæmdastjóri rannsóknar- og þróunarsviðs Össurar hf., þar sem hann leiddi þróun og nýsköpun á lækningatækjum, og var dósent við læknadeild Háskóla Íslands. Hann hefur einnig verið forstjóri og lækningaforstjóri Sjúkrahússins á Akureyri. Þorvaldur hefur víðtæka reynslu af störfum innan heilbrigðisgeirans sem stjórnandi, læknir og ráðgjafi“ segir í tilkynningunni. 

Íslenska líftæknifyrirtækið Genís hf. hefur um tveggja áratuga skeið unnið að rannsóknum og þróun á lífvirkum kítínfásykrum til notkunar í fæðubótarefnum, lyfjum og við beinígræðslu. Fyrirtækið var stofnað árið 2005 og eru höfuðstöðvar og framleiðsla þess á Siglufirði.