Tilboð í nýja Ölfusárbrú voru opnuð í dag. Fimm aðilar höfðu lýst áhuga á verkefninu og höfðu útboðsgögn til skoðunar en aðeins eitt tilboð barst. Það er frá ÞG verktökum ehf. og er um að ræða upphafstilboð. Það þýðir að Vegagerðin fer nú yfir tilboðið og er stefnt að því að fara í samningaviðræður við ÞG verktaka eftir páska. Að því loknu verður gefin upp upphæð endanlegs tilboðs.
„Við erum í fyrsta lagi ánægð að fá tilboð. Þetta var samkeppnisútboð þannig að það fór fram forval og það voru fimm sem tóku þátt í því og voru allir hæfir og fengu allir þátttökurétt. Auðvitað hefðum við viljað sjá fleiri af þeim fara alla leið,“ segir Bergþóra Þorkelsdóttir, forstjóri Vegagerðarinnar, í samtali við fréttastofu.
„Það eru alltaf vonbrigði þegar menn hætta við að bjóða. Það er ekkert launungamál og við hefðum gjarnan viljað sjá fleiri tilboð en þetta er niðurstaðan. Þetta er flókið og stórt útboð. Þetta er svokallað alútboð þar sem krafist er sérþekkingar á tiltekinni gerð brúa, sem við vitum að í flestum tilfellum þarf að sækja erlendis frá þannig að þetta eru fyrirtækjahópar, sem þurfa að bjóða. Það þarf ekki nema einn að ganga úr skaftinu og þá er erfitt fyrir hópinn að halda áfram.“
Tilboð í fjármögnun stóð í mörgum
Hún segir ýmsar ástæður að baki því að hóparnir hafi hætt við að bjóða í verkið.
„Við vitum það að það að við báðum um tilboð í fjármögnun á framkvæmdatímanum var eitthvað sem menn settu verulega fyrir sig. Við báðum sem sagt um tilboð í fjármögnun en hins vegar þá átti það að koma í ljós hvort ríkið vildi nýta hana. Svo er þetta samkeppnisútboð þannig að þegar við erum komin á þennan stað, sem við erum á núna, þurfum við að búa okkur undir viðræður við bjóðanda og markmið þeirra er að fara yfir alla þá möguleika sem eru í stöðunni til að gera verkið fýsilegra og hagkvæmara,“ segir Bergþóra.
Það muni koma í ljós á meðan á viðræðum stendur hvort ríkið gangi að tilboðinu eða fara aðrar leiðir. Bergþóra segist ekki geta gefið upp upphæð tilboðsins fyrr en að loknum viðræðum við ÞG verktaka.
„Þetta er veggjaldaverkefni þannig að það er gert ráð fyrir að veggjald verði tekið yfir brúna, sem standi undir þeim kostnaði sem í hana fer,“ segir Bergþóra.
„Við hættum ekki við að byggja Ölfusárbrú“
Vegagerðin sé mjög áhugasöm um þessa framkvæmd og eins og flestir þekkja, sem eiga leið austur fyrir fjall, er brýnt að byggja nýja brú yfir Ölfusá.
„Þessi brú er búin að vera lengi í undirbúningi hjá Vegagerðinni og hefur verið unnið sérstaklega að því að gera hana að öruggu mannvirki gagnvart jarðskjálftum. Þetta er gríðarlegt jarðskjálftasvæði og það er eitt af því sem gerir þessa brú svona mikla áskorun frá verkfræðilegum sjónarhóli,“ segir Bergþóra.
Flosni upp úr viðræðum verði farið í annað útboð og margar leiðir séu til þess.
„Við hættum ekki við að byggja Ölfusárbrú. Þá verður bara að leita annarra leiða. Það er mikið verk og flókið að taka þátt í alútboði og mun meira verk en að bjóða í framkvæmdaverk sem er fullhannað. Þannig að maður hefur skilning á því.“