„Ég er búinn að bíða eftir þessu mómenti mjög lengi“

Leikurinn er gríðarlega mikilvægur í baráttu um sæti á þriðja Eurobasket móti íslenska landsliðsins frá upphafi. Það munaði mjög litlu að liðið kæmist á HM á síðasta ári en þá vantaði Martin.

Martin hefur ekki spilað með íslenska landsliðinu síðan í febrúar 2022 eða síðan hann sleit krossband í hné. Þetta voru mjög erfið meiðsli og íslenski bakvörðurinn er enn ekki kominn yfir þau að fullu.

Það er samt gott að sjá hann aftur í íslenska landsliðsbúningnum og á fjölum Laugardalshallarinnar. Hvernig er fyrir Martin að mæta aftur?

„Það er bara geggjað. Ég er búinn að bíða eftir þessu mómenti mjög lengi. Ég ætla ekki að vera með of mikla yfirlýsingar því það eru tveir dagar í leik og það getur allt gerst,“ sagði Martin í viðtali við Val Orra Eiríksson á þriðjudaginn.

„Þetta er það skemmtilegasta sem maður gerir í þessu. Að hitta vini sína, koma heim, fá smá íslenskan mat, íslenska vatnið og allt þetta. Það er geggjað að vera kominn aftur,“ sagði Martin.

Martin spilaði síðast fyrir íslenska landsliðið 24. febrúar 2022 og var þá með 23 stig og 7 stoðsendingar í eftirminnilegum sigri á Ítölum.

„Það var einhver að segja að það væri tvö ár en mér líður ekki þannig. Það eru góðar minningar úr Ólafssal á móti Ítalíu. Ég held að það hafi verið síðasti leikur og vonandi getur maður endurtekið þann leik,“ sagði Martin.

Það má horfa á allt viðtalið við Martin hér fyrir neðan.