Þarf að greiða alla leiguna í glæsi­hýsi Magnúsar Ólafs

Um er að ræða glæsilegt 300 fermetra einbýlishús á norðurhlið Kársnessins í Kópavogi. Magnús Ólafur keypti það af hjónunum Ólafi Ólafssyni í Samskip og Ingibjörgu Kristjánsdóttur eiginkonu hans. Húsið er með stóran gluggalausan kjallara, sem telst ekki með í fermetrafjöldanum. Þar er að finna heitan pott, gufubað, setustofu, sturtu, hlandskál, handklæðaofn og innréttingu með vaski með marmara á borði. 

Konan tók einbýlishúsið á leigu af Magnúsi Ólafi í maí 2020. Leiguverð hljóðaði upp á 400 þúsund krónur auk 150 þúsund króna fyrir leigu á húsgögnum. Þá var samið um 825 þúsund krónur í fyrirframgreidda tryggingu.

Bú Magnúsar Ólafs, sem sætir umfangsmikilli rannsókn héraðssaksóknara fyrir fjársvik, var tekið til gjaldþrotaskipta í Danmörku í október 2021. Þrotabúið tók við leigusamningnum og greiddi konan leiguna til þeirra fyrst um sinn. Hún flutti svo úr húsinu áður en leigusamningurinn var runninn út.

Krafan um vangreidda húsaleigu náði til fjögurra mánaða, frá ágúst til nóvember 2022 auk greiðslu á leigu vegna húsgagna. Í ljós kom að konan hafði ekki upplýst þrotabúið um leigusamninginn um húsgögn sem var viðbót við leigusamninginn. 

Nam því krafan 1,8 milljónum króna fyrir vangoldna leigu og 1,95 milljónir fyrir vangreidda leigu á húsgögnum í fimmtán mánuði.

Konan fór fram á að 825 þúsund króna tryggingargjaldið yrði dregið frá skuldinni.

Héraðsdómur Reykjavíkur féllst á kröfu þrotabúsins og dæmdi konuna til að greiða báðar skuldirnar. Þó féllst dómurinn á að tryggingargjaldið skildi dragast frá heildarupphæðinni.

Einbýlishúsið glæsilega er í dag í eigu Sverðs og skjaldar, félags í eigu Eyþórs Guðjónssonar, eins eiganda Sky Lagoon í næsta nágrenni á Kársnesinu. Eyþór keypti það árið 2021 en ásett verð var 235 milljónir króna.

Eyþór var í viðtali í Kaffispjallinu á Vísi í júní 2021.