RÚV biðst af­sökunar vegna fram­göngu sinnar í Grinda­vík

Halldóra Sigtryggsdóttir, íbúi í Grindavík, sagði í Facebook-færslu í dag vera virkilega reið.

„Fréttamenn hafa ekki leyfi til að fara inná heimilið mitt! RÚV skammist ykkar, set inn myndband þið eigið að láta heimilin okkar vera í Grindavíkurbær. Grindvíkingar, kíkið á myndavélarnar og sjáið hvort fréttamenn eru að reyna að komast inn,“ sagði Halldóra.

Það kom merktur fréttamaður heim áðan, tók myndir, reyndi að opna hurðir og leitaði svo að lykli! Lögreglan á Suðurnesjum plís gerið eitthvað í málinu Björgunarsveitin Þorbjörn þetta viljum við ekki.

Óhætt er að segja að Grindvíkingar og fleiri taki undir með Halldóru. Myndbandsupptökunni að ofan hefur þegar þetta er skrifað verið deilt mörg hundruð sinnum og er atvikið til umræðu í ýmsum umræðuhópum.

RÚV beðst velvirðingar í tilkynningu í dag.

„Starfsmaður RÚV sást í dag á öryggismyndavél reyna að komast inn í yfirgefið hús og leita að lyklum að læstum dyrum. Fréttastofa RÚV harmar þetta atvik og biður íbúa hússins og alla Grindvíkinga innilegrar afsökunar á því,“ segir í tilkynningu Heiðars Arnar.

„Fréttamenn RÚV hafa kappkostað að fjalla um atburðina í Grindavík af virðingu fyrir íbúum og eigum þeirra, og vinnubrögðin sem sjást á myndskeiðinu eru ekki í anda vinnureglna eða þess anda sem fréttastofan starfar í. Við höfum rekið atvikið til misskilnings og óðagots á vettvangi, en munum í kjölfarið fara yfir verkferla okkar og vinnureglur og brýna fyrir öllum þeim sem fara á vettvang að virða einkalíf og eigur Grindvíkinga, og valda þeim ekki meiri óþægindum eða sorg en þeir upplifa fyrir.“

Lögreglan á Suðurnesjum segir í svari á Facebook-síðu sinni að málið sé komið á þeirra borð.

Ljósmyndarinn biðst afsökunar

Starfsmaður RÚV, ljósmyndarinn Ragnar Visage, tjáir sig um atvikið á Facebook-síðu sinni.

„Kæru vinir þar sem ég er nú sennilega óvinsælasti maður dagsins þá vil ég innilega afsaka mína hegðun í Grindavík í dag, þetta var í algjöru óðagáti þar sem ég var einn eftir í bænum (fyrir utan viðbragðsaðila) og ég var beðinn um að reyna ná myndefni innanhús, í algjöru hugsunarleysi og í öllum hasarnum fannst mér liggjast beinast við að athuga með að komast inn í næsta hús,“ segir Ragnar. 

„Galið, ég veit!“ 

Ragnar biðst afsökunar.

„Búinn að fá miklar skammir frá Björgunarsveitinni, skiljanlega, og hef beðið þau innilega afsökunar, og þetta er engan veginn í anda vinnu­reglna RÚV eða þess anda sem fréttatof­an starfar í.“

Fréttin hefur verið uppfærð.