Musk íhugar að loka á X í Evrópu

Business Insider greinir frá þessu, en í frétt miðilsins segir að Musk sé orðinn pirraður á því að þurfa að framfylgja reglugerðum sambandsins.

Heimildarmaður miðilsins segir að hann íhugi að gera X-appið óaðgengilegt í álfunni, eða að blokka aðganga frá löndum Evrópusambandsins.

Samfélagsmiðlarisinn Meta er með álíka aðgerðir í gangi þessa stundina gagnvart Evrópubúum sem ekki fá aðgang að forritinu Threads.

Reglugerðin sem fer í taugarnar á Musk tók gildi í ágúst á þessu ári. Samkvæmt henni þurfa netrisar á borð við X að hafa á reiðum höndum skilvirk kerfi til þess að fjarlægja upplýsingar eða efni sem telst falskt, meiðandi, eða villandi.

Business Insider segir að líklega hafi X nú þegar brotið á bága við þetta. Þar sem að mikið af fölskum upplýsingum hafi verið á kreiki varðandi átökin í Ísrael og á Gasaströndinni undanfarnar vikur.

Elon Musk keypti Twitter, sem nú heitir X, fyrir ári síðan. Eftir að hann tók við stjórnartaumunum var stærstum hluta teymis sem sá um að ritskoða miðilinn sagt upp störfum.

Greint var frá því í síðustu viku að sambandið rannsaki nú samstarfsvilja X til þess að gangast við reglugerðinni og óskaði eftir upplýsingum frá miðlinum um hvernig hann ætlaði sér að berjast gegn meiðandi upplýsingum.

X gæti þurft að sæta refsingu vegna þessa. Business Insider segir að sekt sem myndi varða allt að sex prósentur af heildartekjum fyrirtækisins á heimsvísu sé möguleg.