Þetta segir Heimir Ríkarðsson, lögreglufulltrúi á lögreglustöð 3, í samtali við Vísi. Hann segir að upphaflega hafi verið tilkynnt um tíu manna slagsmál en að fjöldi manna á svæðinu sé á reiki.
Mennirnir hafi verið samankomnir í Auðbrekku til þess að krefja fyrrverandi vinnuveitanda þeirra um meint vangreidd laun og muni sem þeir telja eigur sínar.
Heimir segir að enga áverka hafi verið að sjá á neinum hlutaðeigandi og enginn hafi verið fluttur á spítala. Einn hafi hins vegar verið fluttur á lögreglustöð en sleppt skömmu seinna.
Sendu fjölda lögregluþjóna til öryggis
Mikla athygli vakti í gærkvöldi hversu mikinn viðbúnað lögregla viðhafði vegna atviksins. Fimm lögreglubílar og nokkur fjöldi lögreglubifhjóla voru á vettvangi. Myndskeið þaðan má sjá hér að neðan:
Heimir segir að það hafi verið gert í öryggisskyni.
„Ef það er tilkynnt um tíu menn og læti þá sendum við ekki tvo í það bíó.“
