Bára Hlín nýr for­stöðu­maður hjá Sýn

Í tilkynningu segir að Bára muni veita forstöðu teymi verkefnastjóra og ferlaumbótasérfræðinga sem munu leiða áfram lykilbreytingarverkefni félagsins. Teymið vinni náið með mannauði, viðskiptaþróun, vörustjórnun, upplýsingatækni og fjölmiðlalausnum Sýnar sem vinni þvert á rekstrareiningar félagsins.

„Bára kemur til Sýnar frá Marel þar sem hún hefur síðastliðin 5 ár leitt víðtæk og flókin alþjóðleg umbreytingarverkefni. Í því starfi tók hún þátt í að móta faglega verkefnastjórnun fyrir Marel, og leiddi hópa verkefnastjóra og ferlasérfræðinga við að koma á fót sérhæfðri aðfangakeðju fyrir þjónustusvið sem þjónar viðskiptavinum um allan heim. Hún hefur sérhæft sig í breytingastjórnun og stafrænni umbreytingu undanfarin ár, með tilheyrandi áherslu á einföldun og samræmingu ferla í flóknu tækniumhverfi. 

Hún er með meistaragráðu í verkefnastjórnun frá Háskólanum í Reykjavík, og sat í stjórn faghóps Stjórnvísi um breytingastjórnun 2021-2022. Hún vann á árunum 2009-2018 á sviði markaðs- og sölumála í hugbúnaðarþróun, og er meðstofnandi handverksbrugghússins Álfs,“ segir í tilkynningunni. 

Haft er eftir Huldu Hallgrímsdóttur, framkvæmdastjóra Nýsköpunar og reksturs hjá Sýn, að hún sé mjög ánægð með að fá Báru til liðs félagið. Hún sé með alþjóðlega reynslu í stórum umbreytingarvegferðum, verkefnastýringu og umfangsmiklum ferlaumbótum. „Þá er hún með mikinn metnað og drifkraft fyrir nýsköpun og faglegri verkefnastýringu. Við hjá Sýn erum á sóknar- og breytingarvegferð með upplifun viðskiptavina að leiðarljósi og hennar reynsla mun nýtast félaginu vel,“ segir Hulda.

Þá er haft eftir Báru Hlín að Sýn sé fyrirtæki á afskaplega spennandi stað og að hún hlakki til að koma inn í þau metnaðarfullu verkefni sem liggi fyrir með það að markmiði að bjóða viðskiptavinum Sýnar framúrskarandi þjónustu og virði í síbreytilegu umhverfi. „Samstilling viðskiptahagsmuna, ferla, gagna, og upplýsingatækni í flóknum umbreytingum er mér hjartans mál ásamt því að passa vel upp á fólkið sem aðlagast þarf hröðum breytingum,“ segir Bára Hlín.

Vísir er í eigu Sýnar.