Þessi bjóða sig fram í stjórn Íslandsbanka

Það eru Frosti Sigurjónsson, fyrrverandi alþingismaður, Ásgeir Brynjar Torfason, doktor í fjármálum, Helga Hlín Hákonardóttir, lögmaður og eigandi Strategíu, og Elín Jóhannesdóttir, sem starfar hjá Vigri fjárfestingu ehf. Þau sjö sem tilnefnd voru bjóða sig öll fram til stjórnarsetu. 

Boðað var til hluthafafundar og stjórnarkjörs í kjölfar þess að Fjármálaeftirlit Seðlabanka Íslands komst að þeirri niðurstöðu að starfsmenn bankans hafi brotið lög við framkvæmd útboðs á 22,5% eignarhlut ríkisins í Íslandsbanka í mars 2022.

Eftirfarandi sendu inn framboð til stjórnar samkvæmt tilkynningu Íslandsbanka til Kauphallar:

Framboð til aðalstjórnar:

• Agnar Tómas Möller, sjálfstætt starfandi ráðgjafi.
• Anna Þórðardóttir, sjálfstætt starfandi stjórnarmaður.
• Ásgeir Brynjar Torfason, sjálfstætt starfandi fræðimaður og ráðgjafi. Verkefnisstjóri í stjórnsýslu Menntavísindasviðs Háskóla Íslands.
• Elín Jóhannesdóttir, í sérverkefnum fyrir Vigur fjárfesting ehf.
• Frosti Ólafsson, framkvæmdastjóri Olís ehf.
• Frosti Sigurjónsson, sjálfstætt starfandi ráðgjafi.
• Haukur Örn Birgisson, hæstaréttarlögmaður, eigandi og framkvæmdastjóri Íslensku lögfræðistofunnar.
• Helga Hlín Hákonardóttir, meðeigandi og ráðgjafi hjá Strategíu ráðgjafafyrirtæki.
• Linda Jónsdóttir, sem formaður stjórnar, framkvæmdastjóri rekstrar hjá Marel hf.
• Stefán Pétursson, fjármálastjóri EpiEndo Pharmaceuticals ehf.
• Valgerður Skúladóttir, framkvæmdastjóri Sensa ehf.

Framboð til varastjórnar:

• Herdís Gunnarsdóttir, forstjóri Gæða- og eftirlitsstofnunar velferðarmála.
• Páll Grétar Steingrímsson, sjálfstætt starfandi ráðgjafi.

Formaður og varaformaður gefa ekki kost á sér

Í síðustu viku var greint frá því að tilnefningarnefnd Íslandsbanka hafi tilnefnt Lindu Jónsdóttur og Stefán Pétursson sem nýja stjórnarmenn en Finnur Árnason stjórnarformaður, Guðrún Þorgeirsdóttir varaformaður og Ari Daníelsson stjórnarmaður gefa ekki kost á sér til áframhaldandi setu í stjórn Íslandsbanka.

Þá leggur valnefnd Bankasýslu ríkisins, sem fer með hlut ríkisins í Íslandsbanka, til að Haukur Örn Birgisson verði kjörinn nýr inn í stjórn. Tilnefningarnefnd leggur til, í samráði við Bankasýslu ríkisins, að Linda verði kjörin nýr formaður stjórnar en hún er framkvæmdastjóri rekstrar hjá Marel. 

Stefán var fjármálastjóri Arion banka á árunum 2010 til 2021 og hefur starfað sem fjármálastjóri hjá lyfjaþróunarfyrirtækinu EpiEndo Pharmaceuticals ehf. frá árinu 2022. Haukur hefur starfað sem lögmaður í um tvo áratugi og þar af sem sjálfstætt starfandi lögmaður í fimmtán ár.

Agnar Tómas Möller, Anna Þórðardóttir, Frosti Ólafsson og Valgerður Hrund Skúladóttir eru tilnefnd til áframhaldandi stjórnarsetu, auk Páls Grétars Steingrímssonar og Herdísar Gunnarsdóttur í varastjórn.

Linda sé með yfirgripsmikla þekkingu af stjórnun og fjármálum

Í skýrslu tilnefningarnefndar Íslandsbanka kemur fram að Linda Jónsdóttir hafi áður verið fjármálastjóri Marel og þar áður forstöðumaður fjárstýringar, fjármögnunar og fjárfestatengsla.

„Linda hefur yfirgripsmikla alþjóðlega reynslu af stjórnun, fjármálum, hugbúnaði og rekstri í gegnum störf sín hjá Marel, en hjá félaginu starfa um 8.000 manns í yfir 30 löndum og veltir árlega 1,7 milljarði evra. Linda hefur einnig víðtæka starfsreynslu úr íslensku atvinnulífi frá störfum sínum fyrir Eimskip, Burðarás og Straum fjárfestingarbanka. Linda situr í stjórn Vísindagarða og hefur áður sinnt stjórnarstörfum fyrir Viðskiptaráð Íslands og Framtakssjóð Íslands (FSÍ),“ segir í ágripi tilnefningarnefndar.

Boðað til hluthafafundar eftir að bankinn gerðist brotlegur

Í samkomulagi Íslandsbanka við Seðlabankann gengst hann við því að hafa brotið gegn lögum við söluferlið á hlutum ríkisins í bankanum og lýkur málinu með greiðslu 1,16 milljarða króna sektar. Birna Einarsdóttir sagði af sér sem bankastjóri Íslandsbanka í lok júní.

Ari Daníelsson, fráfarandi stjórnarmaður, hefur setið í stjórn frá mars 2022 og komst í fréttir þegar greint var frá því að hann hafi keypt bréf fyrir tæpar 55 milljónir króna í útboði á hlutum ríkisins í Íslandsbanka sem fram fór í fyrra. Samkvæmt Fjármálaeftirliti Seðlabanka Íslands var Ara óheimilt að taka þátt í útboðinu miðað við reglur um viðskipti stjórnenda.

„Þegar litið er til baka var margt sem draga má lærdóm af,“ sagði Finnur Árnason, fráfarandi stjórnarformaður, nýverið um framkvæmd söluútboðsins í ársskýrslu Íslandsbanka og sagði ljóst að bankinn hefði átt að standa sig betur „í ákveðnum þáttum.“

Hafi góðan tíma til að sinna stjórnarstarfinu

Frosti Sigurjónsson, fyrrverandi alþingismaður, forstjóri Nýherja og fjármálastjóri Marels, segir í samtali við Innherja að hann hafi ákveðið að bjóða sig fram þrátt fyrir að vera ekki á lista tilnefningarnefndar. Það sé að lokum ákvörðun hluthafa hverjir taka þar sæti. 

Mikill tími fari í að sitja í stjórn eftirlitsskyldra aðila á borð við Íslandsbanka. „Fyrir fólk sem er upptekið á öðrum vettvangi getur þetta verið töluvert krefjandi.“

„Ég hef góðan tíma,“ segir Frosti sem sat um árabil í bankaráði Seðlabankans. Hann starfi nú við að ráðleggja sprotafyrirtækjum, auk þess sem hann sinnir fjölmörgum barnabörnum sínum og stundar golf. „Ég bý að góðri reynslu og hef áhuga á að gefa kost á mér í krefjandi verkefni,“ segir hann í samtali við Innherja.

Fréttin hefur verið uppfærð.