Hólmum í tjörninni fjölgar um fjóra

Hugmyndir að lagfæringum á núverandi hólmum og byggingu nýrra hólma í Reykjavíkurtjörn voru lagðar fyrir í umhverfis- og skipulagsráði Reykjavíkurborgar í vikunni. 

Áætlað er að byggja fjóra nýja hólma í tjörninni og skipta um jarðveg í þeim hólmum sem þegar standa. Nýju hólmarnir verða byggðir sem þyrping í kringum minni hólmann.

Í tilkynningu Reykjavíkurborgar segir að núverandi hólmar séu undirlagðir hvönn og nýtast því fuglalífinu illa til varps eða dvalar. Að auki hafi stóri hólminn minnkað vegna rofs. Breytingarnar væru því til þess fallnar að efla fuglalíf á tjörninni.

Þá segir að verkefnið sé enn á undirbúningsstigi en hugmyndin sem nú verði unnið með áfram sé að gera þyrpingu af hólmum sem nýtast muni fuglalífinu betur.