Land­búnaðar­stefna ESB henti ís­lenskum land­búnaði illa

Fyrri umræða um þjóðaratkvæðagreiðslu um hvort halda skuli áfram viðræðum Íslands um aðild að Evrópusambandinu fer fram á Alþingi í dag klukkan þrjú. Þar er lagt til að þjóðaratkvæðagreiðslan fari fram 29. ágúst. Samkvæmt henni eru gefnir tveir valkostir: Já, halda áfram viðræðum um aðild Íslands að Evrópusambandinu eða nei, ekki halda áfram viðræðum um aðild Íslands að Evrópusambandinu.

Búast má við fjörugum umræðum á Alþingi í dag. Formaður Miðflokksins útilokaði fyrir helgi í samtali við fréttastofu að málið muni hljóta skjóta afgreiðslu á þingi. Formaður Sjálfstæðisflokksins sagði dagsetninguna henta frasakenndri stefnu ríkisstjórnarinnar en ekki þjóðinni. 

 Hvað hefur breyst síðan síðast?

Margrét Ágústa Sigurðardóttir framkvæmdastjóri Bændasamtakanna segist ekki hafa neitt á móti því að kanna hug þjóðarinnar til áframhaldandi viðræðna en innganga í sambandið sé allt annað mál.

„Að sjálfsögðu höfum við ekkert á móti því að það fari fram þjóðaratkvæðagreiðsla um málið og þá hvort það verði farið í viðræður eða áframhaldandi viðræður. Við gerum hins vegar athugasemd við upplýsingaóreiðu um málið. Við vitum að landbúnaðurinn er einn sá málaflokkur sem yrði fyrir umfangsmestu og varanlegum breytingum við aðild Íslands að sambandinu og helstu áhyggjurnar snúa að því. Þá hentar frjálst flæði landbúnaðarvara illa íslenskum aðstæðum,“ segir Margrét Ágústa.

Margrét Ágústa telur að ekki verði hægt að fá varanlegar undanþágur frá landbúnaðarastefnunni.

„Þá hafa líka verið áhöld uppi um hvort hægt sé að fá undanþágur, en við fyrstu sýn getum við ekki séð að þær hafi verið veittar nema eingöngu tímabundið.  Það eru engar varanlegar almennar undanþágur frá þessari sameiginlegu landbúnaðarstefnu. og hafa í raun aldrei verið veittar,“ segir hún.

Ágústa segir að landbúnaðarmálin hafi gegnt stóru hlutverki síðast þegar aðildarviðræður við sambandið voru stöðvaðar.

„Það var ástæða fyrir því á sínum tíma að viðræðurnar stoppuðu en það var m.a. vegna landbúnaðarkaflans.  Hvað hefur breyst síðan þá? Það væri áhugavert að vita það,“ segir Margrét Ágústa að lokum.