Viðurkenndi á upptöku að gögnin væru leynileg

Þetta er samkvæmt eftirriti sem blaðamenn CNN hafa komið höndum yfir af upptöku sem tekin var upp sumarið 2021 og var tekin á fundi vegna bókar um æviminningar Mark Meadow, sem var skrifstofustjóri Trumps um tíma í Hvíta húsinu.

„Sem forseti, hefði ég getað svipt leyndinni af þeim, en nú get ég það ekki,“ sagði Trump samkvæmt eftirritinu. Heimildarmaður Wasington Post hefur tekið undir fréttaflutning CNN og segir upptökuna vera mjög mikilvægt sönnunargagn gegn Trump.

Trump tók með sér mikið magn skjala þegar hann flutti úr Hvíta húsinu í janúar 2021 og þar á meðal mikið af leynilegum skjölum. Samkvæmt lögum hefði hann átt að afhenda þessi skjöl til Þjóðskjalasafns Bandaríkjanna.

Hann hefur verið ákærður vegna skjalanna en ákæran hefur ekki verið opinberuð enn. Fjölmiðlar vestanhafs segja þó að ákærurnar snúist um að Trump hafi haldið gögnum með ólöglegum hætti og hindrað framgang réttvísinnar.

Sjá einnig: Keppinautar Trump koma honum enn til varnar eftir ákæru

Samkvæmt fréttaflutningi vestanhafs heyrist Trump á áðurnefndri upptöku kvarta yfir Mark Milley, formanni herforingjaráðs Bandaríkjanna. Trump kvartaði yfir því að Milley hefði sagt að Trump hefði viljað ráðast á Íran. Þá sýnir hann þeim sem voru í herberginu skjal sem herforingjaráðið gerði fyrir Trump á sínum tíma.

„Þeir gerðu þetta fyrir mig, þetta er okkar á milli, en þeir sýndu mér þetta. Þetta var hann. Þetta var varnarmálaráðuneytið og hann,“ sagði Trump og var hann að tala um Milley. 

„Bíðið, sjáið þetta hér. Ég var að finna, er þetta ekki ótrúlegt? Þetta sannar mál mitt. Nema þetta er, sko, háleynilegt. Leynilegt. Þetta eru leynilegar upplýsingar. Sjáið. Sjáið þetta. Þetta var gert af hernum og gefið mér.“

Eftir að saksóknarar komu höndum yfir upptökuna kröfðust þeir þess að þessum skjölum um Íran yrði skilað. Lögfræðingar Trump skiluðu einhverjum skjölum um Íran en fundu ekki skjölin sem Trump var að tala um á fundinum sem tekinn var upp.

Frá því málið um skjölin leynilegu leit dagsins ljós hefur Trump ítrekað haldið því fram að hann hafi svipt leyndinni af skjölunum sem hann tók með sér úr Hvíta húsinu. Forsetar Bandaríkjanna hafa umfangsmikið vald til að svipta leyndinni af opinberum skjölum.

Upptakan gefur þó til kynna að hann hafi sjálfur vitað að skjölin væru leynileg. Þá sagði hann einnig, samkvæmt eftirritinu að hann vissi að hann gæti ekki lengur svipt þau leynd.

Ákærðu einnig aðstoðarmann Trump

Saksóknarar ákærðu einnig dag Walt Nauta, aðstoðarmann Trumps, samkvæmt frétt Wall Street Journal. Nauta fylgdi Trump úr Hvíta húsinu og hóf vinnu í Mar-a-Lago, sveitaklúbbi og heimili Trumps eftir forsetatíð hans.

Ekki liggur fyrir af hverju hann var ákærður en Nauta er sagður spila stóra rullu í málinu um skjölin en hann sást á upptökum öryggismyndavéla færa kassa úr geymslurými í sveitaklúbbinum í maí, eftir að yfirvöld stefndu Trump fyrst og kröfðust skjalanna sem hann tók. Natua sagði rannsakendum að hann hefði fært kassana að beiðni Trump.

Skipaði dómarann sjálfur

Þá er einnig búið að skipa dómara til að sitja yfir málinu gegn Trump en hún heitir Aileen Cannon og var skipuð í embætti af Trump sjálfum. Hún var harðlega gagnrýnd í fyrra þegar hún samþykkti kröfu Trump um að skipaður yrði utanaðkomandi aðili til að fara yfir öll gögn sem rannsakendur Alríkislögreglu Bandaríkjanna lögðu hald á þegar húsleit var gerð í Mar-a-Lago í fyrra.

Lagaprófessorar og aðrir sérfræðingar gagnrýndu úrskurð Cannon harðlega og var honum meðal annars lýst sem fordæmalausu inngripi alríkisdómara í opinbera rannsókn.

Í rökflutningi hennar vísaði Cannon mikið til þess að Trump væri fyrrverandi forseti og það að hann og orðspor hans gæti hlotið mikinn skaða verði hann ákærður og þá mögulega á grundvelli gagna sem hefði með réttu átt að skila til hans.

Sá kafli rökflutningar hennar var sérstaklega gagnrýndur þar sem hún gaf Trump sérstöðu í dómskerfi Bandaríkjanna, sem eigi að koma eins fram við alla.

Fjölmiðlar vestanhafs sögðu þá að Trump og lögmenn hans hefðu áður reynt að fá dómsmál honum tengdum til að enda á borði Cannon.